Prezident shu yil 19-fevral kuni Sirdaryo viloyatining Xovos tumaniga tashrif buyurib, Xovos shaharchasining bosh rejasi bilan tanishish asnosida ijtimoiy himoyaga muhtoj va nogironligi bor xotin-qizlarni doimiy ish va uy-joy bilan ta’minlash maqsadida viloyatda 32 ta tikuvchilik majmuasi tashkil etish, 4,2 ming nafardan ortiq ayolni ish bilan ta’minlash bo‘yicha topshiriq bergandi. Bu haqda “Daryo”ga “Xalq bilan muloqot” guruhi ma’lum qildi.
Bu loyihaning ilk natijasi bo‘y ko‘rsatdi: Xovos tumanining “Bunyodkor” mahallasidagi qarovsiz, tashlandiq, sho‘r bosgan joyda qisqa muddat — 17 kun ichida eng zamonaviy texnologiyalar bilan jihozlangan tikuv majmuasi barpo etildi. Buning natijasida mahalladagi 140 nafar xotin-qiz doimiy ish o‘rni bilan ta’minlandi.
“Sirdaryo baraka chevarlari” korxonasining barpo etilishi bilan tumandagi ish bilan band bo‘lmagan xotin-qizlarning moddiy farovonligi oshadi. Ular imtiyozli ipoteka krediti evaziga Xovos hududida qurilayotgan turar joylar bilan ta’minlanadi. Ayollar ham ishli, ham uyli bo‘ladi.
Korxona to‘liq quvvatda ishlay boshlagach, yiliga 8 million dona tayyor mahsulot — sochiqlar, bolalar va kattalar kiyimlari, choyshablar ishlab chiqariladi. Mahsulotning 60 foizi eksportga, qolgani ichki bozorga yo‘naltiriladi.
Izoh (0)