Yaponiyaning Aichi san’at universiteti professori, taniqli yapon san’atshunosi Shibazaki Kodji “O‘zbek qog‘ozini tadqiq qilish” loyihasida ishtirok etmoqda, deb yozadi O‘zA.
Loyihaning O‘zbekistondagi hamkori sifatida Kamoliddin Behzod nomidagi Milliy rassomlik va dizayn instituti tanlangan.
Tadqiqot maqsadi O‘zbekistonda saqlanayotgan qadimiy qog‘ozlar tarkibini Yaponiyaning zamonaviy texnologiyalari yordamida tahlil qilish va tarkibini, uning xitoy qadimiy qog‘ozlaridan farqli xususiyatlarini va tayyorlash texnologiyalarini o‘rganishdan iborat. Shu asosda dunyoga mashhur qadimiy qog‘oz turini ishlab chiqarish mumkin bo‘ladi.
Kamoliddin Behzod nomidagi Milliy rassomlik va dizayn instituti mas’ullari ma’lumotiga ko‘ra, qo‘shma loyiha 2017-yilda boshlangan. O‘tgan vaqt mobaynida qator ilmiy tadqiqotlar amalga oshirildi. Unda O‘zbekiston, Koreya va Xitoy olimlari ishtirok etdi.
Ushbu qo‘shma loyiha doirasida Toshkentda qadimiy o‘zbek va yapon qog‘ozlari, mamlakat olimlari hamda professor K.Shibazaki ijodiy ishlariga doir ko‘rgazma tashkil etildi.
Izoh (0)