Shimoliy Koreya rasmiylari fuqarolar uchun kunlik oziq-ovqat payok miqdorini 576 grammdan 300 grammgacha kamaytirdi. Bu haqda Tengrinews xabar bermoqda.
Bunga toshqinlar va qurg‘oqchilik oqibatida 2018-yilda kuzatilgan rekord darajadagi hosilsizlik tufayli yuzaga kelgan favqulodda vaziyat sabab sifatida ko‘rsatilmoqda.
Payok don-dun, makkajo‘xori va kartoshkadan iborat. Bolalar, ayollar va qariyalar mazkur cheklovdan ozod qilingan. Shuningdek, qo‘shimcha oziq-ovqatga ehtiyoji bor va moliyaviy imkoniyati bo‘lganlar bozorlardan boshqa mahsulotlarni xarid qilishi mumkin.
Ekspertlarga ko‘ra, xalqaro sanksiyalar tufayli KXDR qishloq xo‘jaligi texnikasi, xomashyo va o‘g‘itlar sotib olishda qiyinchiliklarga duch kelmoqda.