Namangan viloyati hokimi Xayrullo Bozorov Qirg‘izistonning O‘zbekistondagi Favqulodda va muxtor elchisi Ibrohim Yunusov boshchiligidagi delegatsiya bilan uchrashdi. Bu haqda “Daryo”ga viloyat hokimligi matbuot xizmati ma’lum qildi.
Suhbat davomida fan, ta’lim, madaniyat, san’at, tibbiyot, qishoq xo‘jaligi, jumladan, pillachilik sohalarida o‘zaro hamkorlikni yo‘lga qo‘yish masalalari muhokama etildi.
Mehmonlar Chortoq tumanidagi “Sof ipak urug‘ invest” o‘zbek-xitoy qo‘shma korxonasi faoliyati bilan yaqindan tanishdi. 2018-yilda barpo etilgan mazkur korxonada bir mavsumda 50 ming quti ipak qurti yetishtiriladi.
Buning uchun maxsus ajratilgan binoda barcha zarur uskuna va jihozlar o‘rnatilgan. Shuningdek, 30 sotix maydonda Xitoy davlatidan keltirilgan 76 ming tupdan ziyod tut ko‘chati ham parvarishlanmoqda. Bu bilan hududda pilla yetishtirishning yangi, istiqbolli loyihalarini amalga oshirish imkoniyati kengayadi.
Delegatsiya a’zolari Namangan shahridagi “Orzu” kichik sanoat zonasida faoliyat boshlagan “Orzu Ideal” tekstil korxonasi imkoniyatlari bilan tanishdi.
Hozirda bu yerda buyurtma asosida turli kiyim-kechaklar ishlab chiqarilmoqda. Loyiha qiymati 16 milliard so‘m bo‘lgan korxonaga Yaponiya, Italiya, Germaniya, Turkiya davlatlaridan zamonaviy dastgohlar keltirib o‘rnatildi. 300 dan ortiq yangi ish o‘rni yaratildi. Bu yerda tayyorlanayotgan mahsulotlarning 90-95 foizini xorijiy davlatlarga eksport qilish maqsad qilib olingan.
Mehmonlar bu yerdagi ishlab chiqarish jarayonlarini ko‘zdan kechirar ekan, tayyorlanayotgan mahsulotlarning sifati va xaridorgirligiga yuksak baho berdi. Kelgusida namanganlik va qirg‘izistonlik tadbirkorlar o‘rtasida o‘zaro hamkorlik aloqalarini yo‘lga qo‘yish va tajriba almashish bo‘yicha kelishib olindi.
Izoh (0)