O‘zbekiston Oshpazlar uyushmasi Gastronomik turizmni ommalashtirishga qaratilgan loyihasi doirasida mamlakatning eng kuchli oshpazlari bilan birgalikda Oshxona ensiklopediyasini tayyorlamoqda. Bu haqda O‘zA xabar berdi.
Bu kitob O‘zbekistonning barcha hududlaridagi turli taomlar retseptini o‘z ichiga oladi. Kitobga nafaqat mashhur milliy taomlarni tayyorlashning usullari, balki kichik shaharlar va hatto qishloqlar uchun xos bo‘lgan taomlarning ta’rifi ham kiritiladi.
Shuningdek, Toshkentning gastronomik xaritasini tuzish ustida ish olib borilmoqda. Bu xaritaning asosiy vazifasi gastronomik turizmni jadal rivojlantirish, o‘zining taomlari, xizmat ko‘rsatish sifati, sanitariya va gigiyena holatining yuqoriligi va boshqa jihatlari bilan pazandachilik san’atining u yoki bu turlarini namoyon eta oladigan umumiy ovqatlanish maskanlarini aniqlash, ulardagi xizmat ko‘rsatish va servis sifatini jahon standartlari darajasiga olib chiqishdir.
Gastronomik xaritani tuzish doirasida har yili Toshkent pazandachiligining noyob xususiyatlarini o‘zida aks ettiradigan festival tashkil etish va poytaxt aholisi, mehmonlarga namoyish qilish rejalashtirilgan.
Izoh (0)