“Milliy” telekanali o‘zbekistonlik ayollarga izzat-ikromini namoyish etgan holda, 2019-yil 5-mart kuni Alisher Navoiy nomidagi Davlat Akademik katta teatrida “O‘zbegim ayoli” Milliy mukofoti taqdimot marosimini o‘tkazmoqda. Bu haqda telekanal press-relizida aytiladi.
Ushbu taqdimot qahramonlari el qatori fuqarolar, sodda, kamtarin va mushtipar buvijon-u onaxonlar, opa-singillardir. Ular ham boshqa millionlab ayollar singari mamlakatning turli hududlarida mehnat qilib, respublikaning iqtisodiy, ijtimoiy, siyosiy, madaniy-ma’rifiy hayotida ishtirok etmoqda. Faqat, ehtimol, boshqalarga nisbatan faolroq, fidoyiroq, sabr-bardoshliroqdirlar. Shuningdek, ona sifatida jamiyatga namuna ekanliklari shubhasiz, deyiladi xabarda.
“O‘zbegim ayoli” dasturi davomida laureatlarga jamiyat rivojlanishiga qo‘shilgan hissa, erishilgan yutuqlar bilan bog‘liq qator nominatsiyalar doirasida mukofot va sertifikatlarni tantanli topshirish marosimi hamda estrada yulduzlari, taniqli san’atkorlar ishtirokida gala-konsert o‘tkazish rejalashtirilgan.
Tadbir boshlanishidan oldin soat 16:00 dan boshlab, teatr oldidagi maydonda “Sulola bend” guruhi tomonidan jonli ijroni hamda illyuzionistlar chiqishlarini o‘z ichiga olgan shou tashkil etiladi.
Tantanali taqdimot dasturi 18:00 dan 21:00 gacha “Milliy” telekanali orqali to‘g‘ridan-to‘g‘ri efirga hamda Alisher Navoiy nomidagi Davlat Akademik katta teatri tashqarisida o‘rnatilgan katta ekranga uzatiladi.
Izoh (0)