Davlat xavfsizlik xizmati Buxoro viloyati boshqarmasi tomonidan ma’lum qilinishicha, Buxoroda “Tramadol” giyohvandlik tabletkalarini olib kirishga uringan shaxs qo‘lga olingan.
Ma’lumki, Vazirlar Mahkamasining 2018-yilning 27-oktabrida qabul qilgan qaroriga muvofiq, “Tramadol”, “Baklosan” kabi bir nechta psixofaol preparatlar giyohvand moddalar hamda psixotrop vositalar ro‘yxatiga kiritilgan. Giyohvandlik vositalari, psixotrop moddalar va prekursorlarni O‘zbekiston hududiga olib kirish, undan olib chiqish hamda ularning noqonuniy kirib kelishi yuzasidan shu kunlarda huquq-tartibot idoralari tomonidan chora-tadbirlar ko‘rilmoqda.
Davlat xavfsizlik xizmati Buxoro viloyati boshqarmasi xodimlari tomonidan o‘tkazilgan tezkor tadbir davomida “Toshkent–Buxoro” yo‘nalishida o‘z shaxsiy avtomashinasida harakatlanib kelayotgan Laziz Mirjalolov (ismi sharifi o‘zgartirilgan) boshqaruvidagi Lacetti mashinasi “Sarmijon” nazorat postida to‘xtatilgan. Avtomashina ko‘zdan kechirilganda, uning orqa o‘rindiqlari ostida 2 dona qora sellofan paketga o‘ralgan 808 kassettadagi jami soni 8080 dona bo‘lgan “Tramadol” giyohvandlik tabletkalari borligi aniqlangan.
Ma’lum qilinishicha, Laziz Mirjalolov bu giyohvandlik moddalarini o‘zining Toshkent shahri, Chilonzor tumanidagi yaqin jinoiy aloqalaridan olgan.
Mazkur holat yuzasidan fuqaro Laziz Mirjalolovga nisbatan O‘zbekiston Respublikasi JKning 273-moddasi 5-qismi (Giyovandlik vositalari, ularning analoglari yoki psixotrop moddalarni ko‘p miqdorda qonunga xilof ravishda sotish) bilan jinoyat ishi qo‘zg‘atilgan. Ushbu modda bilan aybdor deb topilgan shaxs 10 yildan 20 yilgacha ozodlikdan mahrum etiladi.
Hozirda ushbu holat yuzasidan tergov harakatlari olib borilmoqda.
Izoh (0)