Sog‘liqni saqlash vazirligi tomonidan tibbiyot xodimlarining mehnat huquqlari qo‘pol ravishda buzilgan holatlar aniqlanib, bartaraf etilmoqda, deb xabar berdi vazirlik matbuot xizmati.
Jumladan, MKning 237-moddasiga muvofiq, homilador ayollar bilan tuzilgan mehnat shartnomasini ish beruvchining tashabbusiga ko‘ra bekor qilish taqiqlangan bo‘lsa ham, I.Irgashyev nomli Toshkent shahar 4-son klinik shifoxonasi bosh shifokorining 2019-yil 26-yanvardagi buyrug‘iga asosan ushbu shifoxonaning bolalar reanimatsiya bo‘limi o‘rindosh shifokori S.O. bilan tuzilgan mehnat shartnomasi bekor qilingan.
Xodimning vazirlikka murojaatini o‘rganish jarayonida S.O.ning homilador ekanligi fakti o‘z tasdig‘ini topgan. Shunga ko‘ra, bosh shifokorning amaldagi qonun hujjatlariga zid ravishda chiqarilgan buyrug‘i bekor qilinib, vrach S.O. avvalgi ishiga tiklandi hamda majburiy “progul” vaqti uchun haq to‘lab berilishi belgilangan.
Xodimning mehnat huquqlarini qo‘pol ravishda buzgan bosh shifokorga nisbatan intizomiy jazo chorasi qo‘llash masalasini qonunda belgilangan tartibda hal etish Toshkent shahar sog‘liqni saqlash boshqarmasi boshlig‘i zimmasiga yuklatilgan.
Shahrisabz tuman tibbiyot birlashmasi boshlig‘ining 2019-yil 24-yanvardagi buyrug‘iga asosan tug‘ruqxona bo‘limi mudiri Bahrom Kucharov ish beruvchining tashabbusi bilan vaqtincha shoshilinch tez yordam bo‘limiga shifokor vazifasiga o‘tkazilgan. Bunda ish beruvchi tomonidan xodimdan rozilik olinmagan. Vaholanki, MKning 93-moddasiga ko‘ra, vaqtincha boshqa ishga o‘tkazishga xodim bilan ish beruvchi o‘rtasidagi kelishuv bo‘lgan taqdirdagina yo‘l qo‘yiladi.
Ushbu holatda xam Sog‘liqni saqlash vazirining tegishli buyrug‘i bilan Bahrom Kucharov avvalgi ishiga tiklanishi ta’minlanib, xodimning huquqlari to‘liq tiklangan.
Shahrisabz tuman tibbiyot birlashmasi boshlig‘iga nisbatan esa vazir buyrug‘i bilan Mehnat kodeksiga muvofiq o‘rtacha oylik ish haqining o‘ttiz foizi miqdorida jarima intizomiy jazo chorasi qo‘llanilgan.
Izoh (0)