Hafta boshida turli internet nashrlarda Shayxontohur tumani Anhor bo‘yi ko‘chasida joylashgan 78-uyda yashovchi ayrim oilalar boshqa turar-joyga to‘liq ko‘chirilmasdan buzilish ishlari boshlab yuborilganligi haqida maqolalar chop etilgan edi. Toshkent shahar prokuraturasi matbuot xizmatining “Daryo” ga xabar berishicha, ushbu holat yuzasidan tekshiruv o‘tkazilgan va mas’ul shaxs javobgarlikka tortilgan.
Aniqlanishicha, Toshkent shahar hokimining 2017-yil 8-sentabrdagi 1204-sonli qaroriga asosan “Navro‘z Bog‘i” MChJga Shayxontohur tumani, Labzak ko‘chasi bo‘yicha “Navro‘z” madaniyat va istirohat bog‘ini qurish uchun 17 gektarli yer maydoni doimiy foydalanishga ajratib berilgan. Qayd etilgan 3 qavatli turar-joy buzilish hududida joylashgan bo‘lib, 18 xonadondan iborat.
Vazirlar Mahkamasining 2018-yil 23-oktabrdagi yig‘ilishi 5-sonli bayonida ushbu uydagi xonadon egalarini 2018-yilning 20-noyabriga qadar boshqa joyga ko‘chirish va 2018-yilning 10-dekabriga qadar binoni to‘liq buzib tashlash belgilangan.
Shunga asosan, Toshkent shahar hokimligi tomonidan uydagi 10 ta xonadon egalariga Mirzo Ulug‘bek tumani, Qori Niyoziy ko‘chasida va 8 ta xonadon egalariga Shayxontohur tumani, Qozirobod ko‘chasida qurilgan zamonaviy ko‘p qavatli uylardan, buzilayotgan xonadonlaridan ko‘proq maydondagi, barcha qulayliklarga ega bo‘lgan yangi xonadonlar ajratilgan.
Masalan, X.Xolmatovaga tegishli 4-xonadon maydoni 45 kvadrat metr bo‘lib, unga ajratilgan yangi xonadonning maydoni 82 kvadrat metrni tashkil etadi.
Bundan tashqari, barcha xonadon egalariga yangi turar-joylarida qurilish-ta’mirlash ishlari amalga oshirilayotgan vaqtda ijarada yashab turishlari uchun har oyga 1,4 million so‘m hisobidan, 3 oy uchun naqd 4,2 million so‘mdan to‘lab berilgan.
Shuningdek, qariya va ijtimoiy himoyaga muhtoj bo‘lgan fuqarolarga mol-mulklarini ko‘chirish uchun bepul ishchi kuchi va transport ta’minlab berilgan.
Shu bilan birga, maqola yuzasidan o‘tkazilgan tekshirish davomida uyning 2-xonadonida yashovchi E.Nishanbayev, 4-xonadonida yashovchi X.Xolmatova va 7-xonadonida yashovchi L.Shkodskixlar boshqa turar-joylarga ko‘chirilmasdan, ko‘p qavatli uyni buzish ishlari boshlab yuborilganligi ma’lum bo‘ldi.
Toshkent shahar hokimligi Munitsipal aktivlarni boshqarish markazining “Buzilish hududidan ko‘chirish ishlarini tashkil etish va xatlovdan o‘tkazish bo‘limi” yetakchi inspektori Otabek Musayev o‘ziga yuklatilgan vazifalarni bajarishda sustkashlikka yo‘l qo‘yib, odamlarni ko‘chirish masalasini o‘z holiga tashlab qo‘yganligi va nazorat qilmaganligi, bu bilan fuqarolarning huquqlari va qonun bilan qo‘riqlanadigan manfaatlariga putur yetkazilganligi sababli, unga nisbatan intizoimiy javobgarlik to‘g‘risida ish qo‘zg‘atildi.
Hozirda X.Xolmatova va L.Shkodskix uydan to‘liq ko‘chirildi, E.Nishanbayevning uyda faqat mol-mulki qolgan.
Izoh (0)