Ҳафта бошида турли интернет нашрларда Шайхонтоҳур тумани Анҳор бўйи кўчасида жойлашган 78-уйда яшовчи айрим оилалар бошқа турар-жойга тўлиқ кўчирилмасдан бузилиш ишлари бошлаб юборилганлиги ҳақида мақолалар чоп этилган эди. Тошкент шаҳар прокуратураси матбуот хизматининг «Дарё» га хабар беришича, ушбу ҳолат юзасидан текширув ўтказилган ва масъул шахс жавобгарликка тортилган.
Аниқланишича, Тошкент шаҳар ҳокимининг 2017 йил 8 сентябрдаги 1204-сонли қарорига асосан «Наврўз Боғи» МЧЖга Шайхонтоҳур тумани, Лабзак кўчаси бўйича «Наврўз» маданият ва истироҳат боғини қуриш учун 17 гектарли ер майдони доимий фойдаланишга ажратиб берилган. Қайд этилган 3 қаватли турар-жой бузилиш ҳудудида жойлашган бўлиб, 18 хонадондан иборат.
Вазирлар Маҳкамасининг 2018 йил 23 октябрдаги йиғилиши 5-сонли баёнида ушбу уйдаги хонадон эгаларини 2018 йилнинг 20 ноябрига қадар бошқа жойга кўчириш ва 2018 йилнинг 10 декабрига қадар бинони тўлиқ бузиб ташлаш белгиланган.
Шунга асосан, Тошкент шаҳар ҳокимлиги томонидан уйдаги 10 та хонадон эгаларига Мирзо Улуғбек тумани, Қори Ниёзий кўчасида ва 8 та хонадон эгаларига Шайхонтоҳур тумани, Қозиробод кўчасида қурилган замонавий кўп қаватли уйлардан, бузилаётган хонадонларидан кўпроқ майдондаги, барча қулайликларга эга бўлган янги хонадонлар ажратилган.
Масалан, Х.Холматовага тегишли 4-хонадон майдони 45 квадрат метр бўлиб, унга ажратилган янги хонадоннинг майдони 82 квадрат метрни ташкил этади.
Бундан ташқари, барча хонадон эгаларига янги турар-жойларида қурилиш-таъмирлаш ишлари амалга оширилаётган вақтда ижарада яшаб туришлари учун ҳар ойга 1,4 миллион сўм ҳисобидан, 3 ой учун нақд 4,2 миллион сўмдан тўлаб берилган.
Шунингдек, қария ва ижтимоий ҳимояга муҳтож бўлган фуқароларга мол-мулкларини кўчириш учун бепул ишчи кучи ва транспорт таъминлаб берилган.
Шу билан бирга, мақола юзасидан ўтказилган текшириш давомида уйнинг 2-хонадонида яшовчи Э.Нишанбаев, 4-хонадонида яшовчи Х.Холматова ва 7-хонадонида яшовчи Л.Шкодскихлар бошқа турар-жойларга кўчирилмасдан, кўп қаватли уйни бузиш ишлари бошлаб юборилганлиги маълум бўлди.
Тошкент шаҳар ҳокимлиги Муниципал активларни бошқариш марказининг «Бузилиш ҳудудидан кўчириш ишларини ташкил этиш ва хатловдан ўтказиш бўлими» етакчи инспектори Отабек Мусаев ўзига юклатилган вазифаларни бажаришда сусткашликка йўл қўйиб, одамларни кўчириш масаласини ўз ҳолига ташлаб қўйганлиги ва назорат қилмаганлиги, бу билан фуқароларнинг ҳуқуқлари ва қонун билан қўриқланадиган манфаатларига путур етказилганлиги сабабли, унга нисбатан интизоимий жавобгарлик тўғрисида иш қўзғатилди.
Ҳозирда Х.Холматова ва Л.Шкодских уйдан тўлиқ кўчирилди, Э.Нишанбаевнинг уйда фақат мол-мулки қолган.
Изоҳ (0)