25-fevral kuni O‘zbekiston Respublikasi investitsiyalar va savdo vazirligida AQSh Davlat kotibining iqtisodiy masalalar bo‘yicha o‘rinbosari Devid Mil boshchiligidagi Amerika Qo‘shma Shtatlarining Savdo va iqtisodiy masalalar bo‘yicha byurosi vakillaridan iborat delegatsiya bilan uchrashuv bo‘lib o‘tdi. Bu haqda Investitsiyalar va tashqi savdo PR markazi xabar berdi.
Yig‘ilish davomida xorijiy tomon mamlakatdagi qulay tadbirkorlik muhitini yaratish, xususan, daromadlarni qaytarish va milliy valyutani erkin almashtirishni joriy etish bo‘yicha barcha cheklovlarni bekor qilish yuzasidan yaratilgan shart-sharoitlar bilan tanishtirildi. O‘zbekiston Respublikasi hududida bozor mexanizmlarini joriy etish bo‘yicha eng muhim qadamlardan biri yerni xususiylashtirish va chet el fuqarolariga mamlakatda yashashi uchun ruxsatnoma olish huquqi berilganligidir.
Suveren kredit xavfini baholashni va Londondagi qimmatbaho qog‘ozlar bozorida yevrobondlarni muvaffaqiyatli joylashtirish ko‘rsatkichi orqali O‘zbekiston o‘zini xalqaro miqyosda bemalol ko‘rsata oladi. Shu o‘rinda tizimli islohotlar natijalarini e’tirof etib, Iqtisodiy hamkorlik va rivojlanish tashkiloti O‘zbekistonni kredit reytingi bo‘yicha 5-toifaga ko‘tardi.
Yana bir narsani e’tirof etish joizki, Amerika kapitali asosidagi “Djon Dir”, “Xanivel”, “Djeneral Elektrik”, “Xilton”, “Katerpillar” kabi yirik kompaniyalar va boshqalar O‘zbekistonni birgalikda investitsiyaviy loyihalarni amalga oshirish uchun qulay sharoitli ishonchli hamkor sifatida tanlaydi.Uchrashuvda Vashington va Toshkent o‘rtasida investitsiya sohasi, shuningdek, ikki mamlakatning kichik va o‘rta biznes loyihalarini qo‘llab-quvvatlashga yo‘naltirilgan moliyaviy sohadagi o‘zaro hamkorlik mexanizmini ishlab chiqish strategik hamkorlikning istiqbolli yo‘nalishi ekanligi alohida ta’kidlandi.
O‘z navbatida, janob Devid Mil O‘zbekistonning AQSh tadbirkorlik doiralari vakillari bilan savdo aloqalarini rivojlantirish imkoniyatini va xususiy sektorni qo‘llab-quvvatlashga qaratilgan sa’y-harakatlarini yuksak qadrlashini ta’kidladi.Tomonlar O‘zbekistonning Jahon Savdo Tashkilotiga (JST) a’zo bo‘lishi uchun keyingi qadamlar va JST direktori o‘rinbosari Allan Volff tashrifi bo‘yicha fikr almashdi. Vazirlik rahbariyati ijtimoiy-iqtisodiy o‘zgarishlarni amalga oshirish va O‘zbekistonning jahon bozoriga kirishi hamda xalqaro savdo maydonida to‘liq ishtirokchi bo‘lishida JSTga a’zo bo‘lish jarayoni nafaqat tashkilot uchun, balki mamlakat uchun ham ustuvor ahamiyatga ega ekanligini ta’kidladi.
Mamlakatning to‘qimachilik mahsulotlariga “Cotton Campaign” tomonidan baykot qilinishini to‘xtatish istiqbollari ham muhokama etildi. Bu borada O‘zbekistondagi vaziyatni barqarorlashtirish, barcha qabul qilingan xalqaro standartlarga rioya qilish va fuqarolik jamiyatini himoyalash, majburiy mehnat sharoitlarini bartaraf etish borasida amalga oshirilgan keng ko‘lamli chora-tadbirlar aytib o‘tildi.Uchrashuv yakunida tomonlar ikki tomonlama har yili bo‘lib o‘tadigan o‘zbek-amerika siyosiy maslahatlashuvlari doirasida belgilangan masalalarni batafsil muhokama qilish uchun tayyorligini bildirdi.
Izoh (0)