Сульшер Клоппга, Погба эса Салоҳга қарши. Барчаси «Манчестер Юнайтед»—«Ливерпуль» баҳси ҳақида (превью)

Бугун, 24 февраль санаси Англияда катта футбол кунига айланади. Боиси,  Жозе Моуриньо кетгач, Оле-Гуннар Сульшер қўл остида ўз ўйинини топиб бораётган «Манчестер Юнайтед» «Орзулар театри» — «Олд Траффорд»да, АПЛ пешқадамларидан бири бўлиб турган, мавсум чемпионлигига асосий даъвогарлардан бири «Ливерпуль»ни қабул қилади. Қуйида ушбу учрашувга оид маълумотлар ва қизиқарли фактлар тақдим этилади.

Мусобақа жадвалидаги ҳолат

«Манчестер Юнайтед»

Сульшер келгач «Юнайтед»нинг ишлари жойига тушиб кетди. Жамоа янги мураббий қўл остида АПЛда 9 та ўйин ўтказиб, 8 та ғалабага эришди ва битта ўйинда дуранг қайд этди. «Қизил иблислар» кетма-кет ғалабалар сабаб мусобақа жадвалидаги ҳолатини ҳам яхшилаб олди. Айни дамда клуб 26-турдан сўнг 51 очко жамғариб, 4-ўринни банд этиб турибди. Тўплар нисбати эса 52-35. «манкунианлар» амалдаги мавсумда ўз майдонида 12 та ўйинда 25 очко тўплади, 25 та гол уриб, 16 та гол ўтказди. Умуман олган, «Юнайтед» ўз майдонида ҳар доимгидек, яхши натижа кўрсатишда давом этмоқда.

«Ливерпуль»

«Ливерпуль» АПЛда 2019 йил 12 январидан бери мағлуб бўлганича йўқ. Клуб 5 та ўйинда 3 та ғалабага эришиб, 2 та ўйинда дуранг қайд этди. «Қизиллар» 26-турда «Борнмут»ни Муҳаммад Салоҳ, Садио Мане ва Жоржиньо Вейналдумларнинг голлари эвазига мағлуб этди. Клопп жамоаси ҳисобида айни дамда 65 очко мавжуд. Тўплар нисбати эса 59-15. Мерсисайдликлар айни чоғда АПЛ 1-2-ўринларини «Манчестер Сити» (битта кўп ўйин ўтказган) билан бўлишиб турибди. Жорий мавсум «Ливерпуль» сафарда 13 та ўйин ўтказиб, 30 очко жамғарди. 24 та гол уриб, 8 та гол ўтказди, холос. Чемпионликка даъвогарлик қилаётган клуб бугун қандай бўлмасин, «Юнайтед»ни сафарда бўлса ҳам мағлуб этишга ҳаракат қилиб кўради. 

Қизиқарли фактлар

• «Ливерпуль» АПЛ жорий мавсумининг 26 та ўйинидан фақат биттасида мағлуб бўлди (20 та ғалаба, 5 та дуранг);
• «Манчестер Юнайтед» АПЛнинг сўнгги 8 та беллашувида ҳам бўлимларда ҳам ўйинда ғалаба қозонди;
• Биринчи даврадаги беллашувда «Ливерпуль» 3:1 ҳисобида ғалаба қозонган эди. Энди «қизиллар» «Манчестер Юнайтед»ни 2013/14 йилги мавсумдан буён илк марта ҳам меҳмонда ҳам ютишга ҳаракат қилиб кўради;
• «Ливерпуль» 1996 йил октябридан бери илк марта «Юнайтед»га қарши сафарда АПЛ пешқадамларидан бири сифатида майдонга тушмоқда;
• «Ливерпуль» АПЛнинг сўнгги 13 та сафар ўйинидан атиги биттасида мағлуб бўлди;
• «Қизил иблислар» АПЛ доирасида ўз майдонида ўтган сўнгги 6 та ўйинда камида 2 тадан гол урмоқда;
• «Манчестер Юнайтед» АПЛ доирасида «Ливерпуль»га қарши ўтган ўз майдонидаги сўнгги 9 та ўйиндан 7 тасида ғалаба қозонган;
• «Ливерпуль» жорий мавсум АПЛнинг сафардаги барча ўйинларида гол урди.

Учрашув ҳаками

Учрашувни Англиянинг тажрибали ҳакамларидан бири Майкл Оливер бошқариб боради. У 2018/19 йилги мавсумда 21 та ўйинда ишлади. У бу ўйинларда 62 та сариқ карточка кўрсатди. Битта ўйинга ўртача 3 тадан. 5 марта ўйинчиларни майдондан четлатишга мажбур бўлган. Битта ўйинда ўртача 21 марта қоида бузилишини қайд этади.

Ўйиндан олдинги фикрлар

Бу иккала жамоа учун ҳам бирдек ўта муҳим ўйин. Биз кучли тўртликда қолишни истаймиз. «Ливерпуль»га қарши ўйнаймиз ва биз бу «Манчестер Юнайтед» ҳамда жамоа мухлислари учун қанчалик катта аҳамиятга эга эканлигини яхши биламиз. Жамоамиз учун чақирувни кутмоқдамиз. «Юнайтед» тарихидаги муносиб жамоани қуришни хоҳлаймиз. Агар биз уларни ўз уйимизда мағлуб эта олсак, янги қадам ташлаган бўламиз. «Тоттенҳэм», «Арсенал» ва «Челси»ни сафарда ютганимиз ажойиб, бироқ ўзимизни «Олд Траффорд»да ҳам кўрсатишимиз керак.Оле-Гуннар Сульшер, «Манчестер Юнайтед» бош мураббийи

Жуда муҳим ўйин. Улар жуда яхши ҳолатда. Жисмоний жиҳатдан кучли, ўзига тўлиқ ишонган ва яхши ҳимойланиб, кўплаб ҳужумлар ташкил қилмоқда. Биз натижага эришиш учун қўлдан келганича ҳаракат қиламиз. Ўйиннинг муҳимлигини чуқурлаштирмасдан, шунчаки ўзимизнинг энг яхши ўйинимизни кўрсатишимиз керак. Ҳозир «Юнайтед»ни мағлуб этиш учун бизга ноқулай вақт эканлигини ва улар учун эса бу идеал ҳолат эканлиги ҳақида ўйлаб турганингизни яхши биламан. Аммо биз «Олд Траффорд»га кучсиз рақиб сифатида йўл олмаяпмиз. Биз ҳам яхшигина шаклланган жамоамиз, ахир.

Юрген Клопп, «Ливерпуль» бош мураббийи