Ronaldu Madridda va u yana Grizmannga qarshi. Barchasi “Atletiko M”—“Yuventus” to‘qnashuvi haqida (prevyu)

Yevropa Chempionlar Ligasining 1/8 finali doirasida bugun so‘nggi 2 ta o‘yin bo‘lib o‘tadi. Ulardan biri Madridda “Atletiko” hamda Turinning “Yuventus” jamoalari o‘rtasida kechadi. Quyida uchrashuvga oid ma’lumotlar va qiziqarli faktlar taqdim etiladi.

“Atletiko” joriy mavsum o‘z maydonida o‘tadigan Chempionlar Ligasi finalida o‘ynashni orzu qilmoqda. Ammo taqdir uni 1/8 finaldayoq Krishtianu Ronaldu yetakchiligidagi “Yuventus”ga ro‘baro qildi. Ko‘pchilik qur’adan oldin ikkala jamoani ham musobaqa favoritlari qatorida ko‘rayotgan edi. Biroq ulardan biri musobaqa bilan erta xayrlashishiga to‘g‘ri keladi. Albatta, ularning bu bosqichda bir-biriga to‘g‘ri kelgani neytral muxlislarga xush yoqqani bor gap. Ammo mazkur o‘yin sabab g‘alaba qozongan jamoa o‘ziga bo‘lgan ishonchni yanada orttirib olishi ham ayni haqiqat.

Jamolarning o‘yindan oldingi holati

Ispaniya La Ligasida “Atletiko”ning o‘yini biroz pastladi. Buni natijalar ham isbotlab turibdi. “Matraschilar” avval “Betis”ga so‘ngra hamshahari “Real”ga imkoniyatni boy berdi. Ammo “Yuventus” bilan o‘yindan oldin yana g‘alabali odimni boshladi. Klub Antuan Grizmanning yagona goli evaziga “Rayo Valyekano”dan ustun keldi va bir tur o‘tmay ikkinchi o‘rinni “Jirona”ga yutqazib qo‘ygan “Real”dan qaytarib oldi.

“Yuventus” esa “Atletiko” bilan o‘yinga qadar Italiya Kubogidan chiqib ketdi. A Seriyada esa hamon yakka peshqadam bo‘lib turibdi. So‘nggi uchta o‘yinda quyidagi natijalarni qayd etdi: “Parma” bilan durang, “Sassuolo” va “Frozinone” ustidan bir xil — 3:0 hisobidagi g‘alaba. Jamoa ayni damda bor diqqat-e’tiborini Chempionlar Ligasiga qaratgan. Boisi klub uchun “shalpangquloq” kubok so‘nggi yillardagi asosiy orzu va maqsad bo‘lib qolmoqda. Shuning uchun ham Turin superklubi Chempionlar Ligasini yutish hadisini olgan Krishtianu Ronalduni o‘z safiga qo‘shib oldi. “Yuventus” A Seriyani Ronaldusiz ham u bilan ham yuta oladi. Ammo Chempionlar Ligasiga qo‘lga hadeganda yetavermagach, “qahramon”—Ronalduga murojaat etildi. Ronni esa “Real” bilan so‘nggi uch yilda “shalpangquloq”ni hech kimga bermadi. Portugaliyalik yulduz ham “Yuventus” bilan Chempionlar Ligasini yutish asosiy maqsadi ekanligini bot-bot takrorlashdan charchamayapti. Shunday ekan, “Atletiko”—“Yuventus” qarama-qarshiligi 1/8 final bosqichining bezagi bo‘lishining ehtimoli kam emas.

• “Atletiko” Chempionlar Ligasidagi so‘nggi uchta o‘yinda o‘z darvozasidan bitta ham gol o‘tkazmadi;
• “Atletiko” Chempionlar Ligasidagi so‘nggi o‘nta o‘yindan to‘qqiztasida mag‘lub bo‘lmadi;
• “Atletiko” va “Yuventus” atigi ikki marta Chempionlar Ligasida o‘zaro duch kelgan. U ham bo‘lsa 2014/15-yilgi mavsum guruh bosqichida. O‘shanda “Atletiko” “Yuventus”ni 1:0 hisobida yenggan, ikkinchi o‘yinda esa tomonlar golsiz durangni qayd etgan;
• “Yuventus” Chempionlar Ligasida so‘nggi oltita safar o‘yinida mag‘lub bo‘lmadi. Turin klubi beshta o‘yinda g‘alaba qozonib, bitta o‘yinda durang qayd etdi.

Uchrashuv hakami

O‘yinni germaniyalik Feliks Svayer boshqarib boradi. Svayer 2018/19-yilgi mavsumda 6 ta xalqaro o‘yinda ishlagan. U bu bellashuvlarda 40 ta sariq kartochka ko‘rsatgan. Bitta o‘yinga o‘rtacha — 6,7 tadan. Qizil kartochkani esa cho‘ntagidan chiqarishga hojat bo‘lmagan. Bitta o‘yinda o‘rtacha 30 ta qoida buzilishini qayd etadi.  

Taxminiy tarkiblar

O‘yindan oldingi fikrlar

Hozir ustunlik hech kimda emas. Hammada bir xil imkoniyat — 50 ga 50. Odatdagidek jang qilamiz. Chempionlar Ligasi ajoyib musobaqa. Unda bizni “Yuventus”ga o‘xshagan katta jamoalarga qarshi o‘yinlar kutadi. Bunday o‘yinlar bizning o‘sishimizga, rivojlanishimizga ko‘mak beradi. Biz ushbu musobaqada ishtirok etayotganligimizdan faxrlanamiz.Diyego Simeone, “Atletiko Madrid” bosh murabbiyi

G‘alaba qozonish uchun ko‘proq mehnat qilish kerak, shu bilan birga biroz omad ham kerak. Bular Chempionlar Ligasi mohiyatini belgilab berai. Ronalduning tarkibda borligi katta ustunlik beradi. Negaki Krishtianu va Messi Chempionlar Ligasi musobaqasining so‘nggi 10 yildagi eng yaxshi to‘purarlari hisoblanadi. Ammo jamoa ham yaxshi natija ko‘rsata olishi kerak. Ronni bilan bizda g‘alabaga bo‘lgan imkoniyat ko‘proq, biroq bu kafolat degani emas.

Massimiliano Allegri, “Yuventus” bosh murabbiyi