Hibsga olingan Oliy sud raisi o‘rinbosari, sumkasidan to‘pponcha topilgan toshkentlik o‘quvchi, Bangladesh poytaxtidagi katta yong‘in va kunning boshqa muhim xabarlari

21-fevralning e’tiborga molik yangiliklari — “Daryo” dayjestida.

Toshkentda Oliy sud raisining o‘rinbosari Bahodir Dehqonov hibsga olindi.

Bahodir Dehqonov Oliy Majlisning Senati tomonidan 2017-yil 27-may kuni besh yil muddatga Oliy sudi raisining o‘rinbosari – Ma’muriy ishlar bo‘yicha sudlov hay’ati raisi lavozimiga saylangandi.

***

Toshkentda 10-sinf o‘quvchisining sumkasidan to‘pponcha va o‘q-dorilar topildi.

Bolaning sumkasida 1 dona MINI UZI IWI 16C30245 raqamli glushiteli bilan birga pnevmatik avtomat,  4 ta pnevmatik gaz ballon, 1 dona pnevmatik avtomat uchun magazin bir plasmassa idishda 1,5 mingga yaqin metall zoldir va bosh uchun maska topilgan.

Ushbu voqea yuzasidan axborot bergan Xalq ta’limi vazirligi ota-onalarni farzandlariga jamoat joylarida, jumladan, maktab hududiga bu kabi buyumlarni olib kelmasligi haqida tushuntirishlar berishga chaqirdi.

Shuningdek, OAV vakillarini bu kabi holatlardan shov-shuv yaratmaslikka chaqirdi.

***

Bangladesh poytaxtida yuz bergan yong‘in qurbonlari soni 81 kishiga yetdi.

Yong‘in kimyoviy mahsulotlar ombori sifatida ham foydalanilgan 4 qavatli turar joyda ro‘y bergan va keyinroq yana to‘rtta binoga tarqalgan.

Qayd etilishicha, 50 dan ortiq kishi kasalxonaga yotqizilgan. Ayrimlari og‘ir ahvolda.

Shavkat Mirziyoyev Bangladeshada yuz bergan yong‘in munosabati bilan mamlakat xalqi, prezident Abdul Hamid va bosh vazir Shayx Hasina Vazedga chuqur ta’ziya izhor etdi.

***

Xonanda Aziza bola o‘g‘irlashda ayblanmoqda.

O‘zbekistonlik qiz “Na samom dele” dasturi orqali xonanda Azizani topib berishni so‘radi. Ayolning so‘zlariga ko‘ra, qo‘shiqchi uning erini o‘ziga qaratib olgan hamda bolasini yashirgan.

***

Navoiyda o‘quvchilarning yoppasiga kaltaklanishi sababi ma’lum bo‘ldi.

Mazkur voqea 2018-yil 14-oktabr kuni Navoiy viloyatidagi ixtisoslashtirilgan madaniyat maktabida sodir bo‘lgan. Shu maktabning 3-bosqichida tahsil oluvchi, yotoqxona sardori Aziz Suvonov eshikni kim sindirgani borasidagi savolga o‘quvchilardan qoniqarli javob ololmagach, sherigi Husniddin Holiqov bilan ularni kaltaklagan. Voqea guvohi Shahzod Abduvohidov uni qo‘l telefoniga tasvirga tushirib olgan.