21-fevral – Butunjahon ekskursovodlar kuni munosabati bilan Toshkentda III xalqaro gidlar forumi o‘z ishini boshladi, deb yozadi O‘zA.
“Buyuk ipak yo‘li: chegarasiz hamkorlik” nomi ostida o‘tayotgan forumda mamlakatning turli hududlaridan kelgan gidlar, turoperatorlar, muzeyshunoslar va turizm sohasi bo‘yicha boshqa mutaxassislar, xalqaro ekspertlar ishtirok etmoqda.
Forumning ochilishida O‘zbekiston Respublikasi Turizmni rivojlantirish davlat qo‘mitasi raisi vazifasini bajaruvchisi Abdulaziz Oqqulov O‘zbekiston Respublikasi gidlar uyushmasi tashkil etilganini aytib o‘tdi.
– Gidlar uyushmasini tashkil etish masalasi 10 yildan ziyod vaqt davomida o‘rtaga tashlanib kelinayotgan edi va nihoyat Turizmni rivojlantirish davlat qo‘mitasi, “Turizm o‘quv konsalting markazi” davlat unitar korxonasi va mamlakatimiz gidlarining birgalikdagi sa’y–harakatlari bilan loyiha amalga oshdi, – dedi A.Oqqulov.
A. Oqqulovning qayd etishicha, gidlar uyushmasi O‘zbekiston turizm bozori ishtirokchilarini o‘zida birlashtirib, uning asosiy vazifalaridan biri mamlakatda sayyohlik sohasida gidlik faoliyati uchun samarali bo‘lgan ijtimoiy iqtisodiy shart-sharoitlar yaratish hisoblanadi.
Ayni vaqtda Forum doirasida “Buyuk ipak yo‘li: chegarasiz hamkorlik” mavzusida xalqaro ilmiy-amaliy konferensiya o‘z ishini davom ettirmoqda.
Forum ikki kun davom etadi.
Izoh (0)