Ҳибсга олинган Олий суд раиси ўринбосари, сумкасидан тўппонча топилган тошкентлик ўқувчи, Бангладеш пойтахтидаги катта ёнғин ва куннинг бошқа муҳим хабарлари

21 февралнинг эътиборга молик янгиликлари — «Дарё» дайжестида.

Тошкентда Олий суд раисининг ўринбосари Баҳодир Деҳқонов ҳибсга олинди.

Баҳодир Деҳқонов Олий Мажлиснинг Сенати томонидан 2017 йил 27 май куни беш йил муддатга Олий суди раисининг ўринбосари – Маъмурий ишлар бўйича судлов ҳайъати раиси лавозимига сайланганди.

***

Тошкентда 10-синф ўқувчисининг сумкасидан тўппонча ва ўқ-дорилар топилди.

Боланинг сумкасида 1 дона MINI UZI IWI 16C30245 рақамли глушители билан бирга пневматик автомат,  4 та пневматик газ баллон, 1 дона пневматик автомат учун магазин бир пласмасса идишда 1,5 мингга яқин металл золдир ва бош учун маска топилган.

Ушбу воқеа юзасидан ахборот берган Халқ таълими вазирлиги ота-оналарни фарзандларига жамоат жойларида, жумладан, мактаб ҳудудига бу каби буюмларни олиб келмаслиги ҳақида тушунтиришлар беришга чақирди.

Шунингдек, ОАВ вакилларини бу каби ҳолатлардан шов-шув яратмасликка чақирди.

***

Бангладеш пойтахтида юз берган ёнғин қурбонлари сони 81 кишига етди.

Ёнғин кимёвий маҳсулотлар омбори сифатида ҳам фойдаланилган 4 қаватли турар жойда рўй берган ва кейинроқ яна тўртта бинога тарқалган.

Қайд этилишича, 50 дан ортиқ киши касалхонага ётқизилган. Айримлари оғир аҳволда.

Шавкат Мирзиёев Бангладешада юз берган ёнғин муносабати билан мамлакат халқи, президент Абдул Ҳамид ва бош вазир Шайх Ҳасина Вазедга чуқур таъзия изҳор этди.

***

Хонанда Азиза бола ўғирлашда айбланмоқда.

Ўзбекистонлик қиз «На самом деле» дастури орқали хонанда Азизани топиб беришни сўради. Аёлнинг сўзларига кўра, қўшиқчи унинг эрини ўзига қаратиб олган ҳамда боласини яширган.

***

Навоийда ўқувчиларнинг ёппасига калтакланиши сабаби маълум бўлди.

Мазкур воқеа 2018 йил 14 октябрь куни Навоий вилоятидаги ихтисослаштирилган маданият мактабида содир бўлган. Шу мактабнинг 3-босқичида таҳсил олувчи, ётоқхона сардори Азиз Сувонов эшикни ким синдиргани борасидаги саволга ўқувчилардан қониқарли жавоб ололмагач, шериги Ҳусниддин Ҳолиқов билан уларни калтаклаган. Воқеа гувоҳи Шаҳзод Абдувоҳидов уни қўл телефонига тасвирга тушириб олган.