Oxirgi kunlarda “Daryo” tahririyatiga “Yangi olingan xorijga chiqish pasporti bilan shu paytgacha biz bilan o‘zaro vizasiz aloqada bo‘lgan va pasportga maxsus xorijga chiqish uchun ruxsatnoma (OVIR) muhrini urdirmasdan chiqsa bo‘ladigan MDH davlatlariga, xususan, Rossiya, Tojikiston, Qozog‘iston davlatlariga ham chiqaversa bo‘ladimi? Mabodo shu davlatlarga yangi xorijga chiqish pasporti bilan chiqsak, u yerlarda bizga nisbatan huquqni himoya qilish organlari tomonidan muammo bo‘lmaydimi?” degan mazmunda bir nechta murojaat bo‘ldi. Shu munosabat bilan “Daryo” kolumnisti G‘ayrat Yo‘ldosh ushbu savolga javob qidirib ko‘rdi.
Taxminimizcha, ko‘pchilik xorijga chiqish pasporti oldingi xorijga chiqish ruxsatnomasi o‘rniga joriy qilinayotgani uchun bu pasport bilan faqat o‘sha OVIR bilan chiqish kerak bo‘lgan davlatlarga chiqiladi deb o‘ylar ekan. Aynan shu masalada fuqarolarga axborot berish maqsadida Samarqand viloyati Migratsiya va fuqarolikni rasmiylashtirish boshqarmasi boshlig‘i Davron Ochilovich Norchayevga murojaat qildik.
Uning ma’lum qilishicha, 2019-yil 1-yanvardan boshlab berilayotgan yangi xorijga chiqish pasporti bilan har qanday mamlakatga bemalol chiqsa bo‘ladi, shu jumladan MDH davlatlariga ham. Bunday pasport bilan MDH davlatlariga borgan fuqarolarga u yerda huquqni himoya qilish organlari tomonidan hech qanday muammo bo‘lmaydi. Chunki yangi berilayotgan xorijga chiqish pasporti xalqaro maqomga ega va dunyoning barcha mamlakatlari tomonidan hech qanday muammosiz tan olinadi.
Shuningdek, xorijga chiqish pasportini olganlar 2021-yilgacha qo‘llarida bo‘lgan oddiy fuqarolik pasporti bilan ham MDH davlatlariga bemalol chiqa oladi.
MDH davlatlaridan boshqa davlatlarga chiqmoqchi bo‘lgan fuqarolar esa o‘zlari chiqmoqchi bo‘lgan turli davlatlarning O‘zbekiston fuqarolariga viza masalasida qo‘yayotgan talablarini albatta inobatga olishi kerak.
Masalan, O‘zbekiston fuqarolari MDH davlatlari va yana boshqa bir qancha davlatlarga vizasiz chiqa oladi. Ba’zi mamlakatlar esa O‘zbekiston fuqarolariga chegarada, kirish joyida (masalan, aeroportda) viza urib beradi, albatta ma’lum boj to‘lovi evaziga. Yana bir guruh davlatlarga borish uchun esa fuqarolarimiz o‘sha davlatlarning mamlakatimizdagi elchixonalari orqali viza oladi.
Davron Ochilovichning bizga ma’lum qilishicha, hozirga qadar yangi pasport borasida aholidan eng ko‘p tushayotgan savollar xorijga chiqish pasporti olgandan so‘ng unga FHDYO organlarining nikoh haqidagi qaydi va propiska muhrlari urilishi haqida bo‘lmoqda. Xorijga chiqish pasportida bunday muhr va ma’lumotlar joylashtirilmaydi. Faqatgina 16 yoshga to‘lmagan bolalarga hamrohlik qiluvchi shaxs haqidagi ma’lumotni shu yerda birdan pasportga qayd etib berilmoqda.
Eslatib o‘tamiz, xorijga chiqish uchun alohida pasport mamlakat Prezidentining 2017-yil 16-avgustdagi “O‘zbekiston Respublikasi fuqarolarining xorijga chiqish tartibini takomillashtirishga doir muhim chora-tadbirlar to‘g‘risida”gi farmoni asosida joriy yil 1-yanvaridan boshlab joriy etilgan.
Yangi tartib bo‘yicha, O‘zbekiston fuqarosi chet elga chiqishi uchun xorijga chiqish uchun biometrik pasportiga bo‘lishi hamda ushbu pasport Vazirlar Mahkamasi huzuridagi Davlat personallashtirish markazi tomonidan 10 ish kuni davomida tayyorlanib berishi belgilangan.
Yangi tartib bo‘yicha, fuqaro xorijga chiqish pasportini olish uchun ish joyi, o‘qish maskani yoki hududiy o‘zini o‘zi boshqarish organi tomonidan muhr bilan tasdiqlangan ariza-anketadan bir nusxadan topshirishi, unga qo‘shimcha ravishda 3,5 sm x 4,5 sm hajmdagi bir dona fotosurat, pasport nusxasi, hududiy Mudofaa ishlari bo‘limi ma’lumotnomasi (agar harbiy xizmatga majbur bo‘lsa) hamda eng kam ish haqining 120 foizi miqdoridagi (voyaga yetmaganlar uchun EKIHning 80 foizi miqdorida) davlat boji undiriladi.
Xorijga chiqish uchun biometrik pasport 1 yoshgacha bo‘lgan bolalarga 2 yil, voyaga yetmagan bolalarga 5 yil, voyaga yetgan fuqarolarga 10 yil muddatga beriladi.
Izoh (0)