Охирги кунларда «Дарё» таҳририятига «Янги олинган хорижга чиқиш паспорти билан шу пайтгача биз билан ўзаро визасиз алоқада бўлган ва паспортга махсус хорижга чиқиш учун рухсатнома (ОВИР) муҳрини урдирмасдан чиқса бўладиган МДҲ давлатларига, хусусан, Россия, Тожикистон, Қозоғистон давлатларига ҳам чиқаверса бўладими? Мабодо шу давлатларга янги хорижга чиқиш паспорти билан чиқсак, у ерларда бизга нисбатан ҳуқуқни ҳимоя қилиш органлари томонидан муаммо бўлмайдими?» деган мазмунда бир нечта мурожаат бўлди. Шу муносабат билан «Дарё» колумнисти Ғайрат Йўлдош ушбу саволга жавоб қидириб кўрди.
Тахминимизча, кўпчилик хорижга чиқиш паспорти олдинги хорижга чиқиш рухсатномаси ўрнига жорий қилинаётгани учун бу паспорт билан фақат ўша ОВИР билан чиқиш керак бўлган давлатларга чиқилади деб ўйлар экан. Айнан шу масалада фуқароларга ахборот бериш мақсадида Самарқанд вилояти Миграция ва фуқароликни расмийлаштириш бошқармаси бошлиғи Даврон Очилович Норчаевга мурожаат қилдик.
Унинг маълум қилишича, 2019 йил 1 январдан бошлаб берилаётган янги хорижга чиқиш паспорти билан ҳар қандай мамлакатга бемалол чиқса бўлади, шу жумладан МДҲ давлатларига ҳам. Бундай паспорт билан МДҲ давлатларига борган фуқароларга у ерда ҳуқуқни ҳимоя қилиш органлари томонидан ҳеч қандай муаммо бўлмайди. Чунки янги берилаётган хорижга чиқиш паспорти халқаро мақомга эга ва дунёнинг барча мамлакатлари томонидан ҳеч қандай муаммосиз тан олинади.
Шунингдек, хорижга чиқиш паспортини олганлар 2021 йилгача қўлларида бўлган оддий фуқаролик паспорти билан ҳам МДҲ давлатларига бемалол чиқа олади.
МДҲ давлатларидан бошқа давлатларга чиқмоқчи бўлган фуқаролар эса ўзлари чиқмоқчи бўлган турли давлатларнинг Ўзбекистон фуқароларига виза масаласида қўяётган талабларини албатта инобатга олиши керак.
Масалан, Ўзбекистон фуқаролари МДҲ давлатлари ва яна бошқа бир қанча давлатларга визасиз чиқа олади. Баъзи мамлакатлар эса Ўзбекистон фуқароларига чегарада, кириш жойида (масалан, аэропортда) виза уриб беради, албатта маълум бож тўлови эвазига. Яна бир гуруҳ давлатларга бориш учун эса фуқароларимиз ўша давлатларнинг мамлакатимиздаги элчихоналари орқали виза олади.
Даврон Очиловичнинг бизга маълум қилишича, ҳозирга қадар янги паспорт борасида аҳолидан энг кўп тушаётган саволлар хорижга чиқиш паспорти олгандан сўнг унга ФҲДЁ органларининг никоҳ ҳақидаги қайди ва прописка муҳрлари урилиши ҳақида бўлмоқда. Хорижга чиқиш паспортида бундай муҳр ва маълумотлар жойлаштирилмайди. Фақатгина 16 ёшга тўлмаган болаларга ҳамроҳлик қилувчи шахс ҳақидаги маълумотни шу ерда бирдан паспортга қайд этиб берилмоқда.
Эслатиб ўтамиз, хорижга чиқиш учун алоҳида паспорт мамлакат Президентининг 2017 йил 16 августдаги «Ўзбекистон Республикаси фуқароларининг хорижга чиқиш тартибини такомиллаштиришга доир муҳим чора-тадбирлар тўғрисида»ги фармони асосида жорий йил 1 январидан бошлаб жорий этилган.
Янги тартиб бўйича, Ўзбекистон фуқароси чет элга чиқиши учун хорижга чиқиш учун биометрик паспортига бўлиши ҳамда ушбу паспорт Вазирлар Маҳкамаси ҳузуридаги Давлат персоналлаштириш маркази томонидан 10 иш куни давомида тайёрланиб бериши белгиланган.
Янги тартиб бўйича, фуқаро хорижга чиқиш паспортини олиш учун иш жойи, ўқиш маскани ёки ҳудудий ўзини ўзи бошқариш органи томонидан муҳр билан тасдиқланган ариза-анкетадан бир нусхадан топшириши, унга қўшимча равишда 3,5 см х 4,5 см ҳажмдаги бир дона фотосурат, паспорт нусхаси, ҳудудий Мудофаа ишлари бўлими маълумотномаси (агар ҳарбий хизматга мажбур бўлса) ҳамда энг кам иш ҳақининг 120 фоизи миқдоридаги (вояга етмаганлар учун ЭКИҲнинг 80 фоизи миқдорида) давлат божи ундирилади.
Хорижга чиқиш учун биометрик паспорт 1 ёшгача бўлган болаларга 2 йил, вояга етмаган болаларга 5 йил, вояга етган фуқароларга 10 йил муддатга берилади.
Изоҳ (0)