19-fevralning e’tiborga molik yangiliklari — “Daryo” dayjestida.
O‘zbekiston Respublikasi Prezidenti Shavkat Mirziyoyev 19-fevral kuni Sirdaryo viloyatiga tashrif buyurdi.
Davlat rahbari Sirdaryo iqtisodiyoti uchun muhim va istiqbolli loyihalar bilan tanishdi.
So‘ng Xovos shaharchasining bosh rejasi bilan tanishdi.
Shundan keyin Xovosda gidroponika usulidagi issiqxonani ko‘zdan kechirdi.
Bundan tashqari, Prezident Yangiyer shahrida tashkil etilishi rejalashtirilgan ammiak va karbamid zavodi qurilish maydonida bo‘ldi.
***
Iroqlik ayol dunyoga keltirgan 7 egizak vafot etdi.
25 yoshli ayol 15-fevral kuni al-Battul shifoxonasida olti qiz va bir o‘g‘ilni tabiiy yo‘l bilan dunyoga keltirgan edi.
Chaqaloqlar 19-fevral, seshanba kuni vafot etdi. Ularning o‘limi tafsilotlari ma’lum qilinmagan.
***
Toshkent hayvonot bog‘ida Safari parki va akvanarium quriladi.
Joriy yilda Toshkent hayvonot bog‘iga Moskva hayvonot bog‘idan o‘n turdagi hayvonlar olib kelinishi rejalashtirilgan. Vazirlar Mahkamasining “2016 – 2020-yillar davomida Toshkent hayvonot bog‘ini rivojlantirish konsepsiyasini tasdiqlash to‘g‘risida”gi qaroriga asosan Toshkent hayvonot bog‘i hududi kengaytirilib, Safari parki ochiladi. Yangi akvanarium binosi qurilib, bu yerda dengiz hayvonlarining turlari ko‘paytiriladi.
***
Nargiza Salmonova: To‘yim kemada bo‘lishini orzu qilgandim, orzum ushaldi.
Aktrisa Nargiza Salmonova turkiyalik Emrah Sayan ismli yigit bilan turmush qurgani haqida xabar berilgan edi.
Nargiza va Emrahning musulmoncha to‘ylari biroz avval bo‘lib o‘tgandi. Ularning zamonaviy nikoh oqshomi Istanbul shahrida, villada bo‘lib o‘tdi. To‘yda juftlikning yaqinlari va oila a’zolari ishtirok etdi.
***
16 joyidan pichoqlangan ayol va uning homilasi qanday saqlab qolindi?
“Sevimli” telekanalining “Zamon” informatsion-tahliliy ko‘rsatuvi qayni ukasi tomonidan 16 marta pichoq urilgan homilador ayolni shifokorlar qanday saqlab qolgani haqida lavha tayyorladi.
12-fevral kuni Jinoyat ishlari bo‘yicha Toshkent shahar sudi binosida homilador kelinoyisini pichoqlagan 21 yoshli yigitga sud hukmi o‘qildi. Unga JKning bir qator moddalari bilan 15 yil muddatga ozodlikdan mahrum etish jazosi tayinlandi.
Izoh (0)