Andijon tumanidagi Baxt mahallasida jinoyat, fuqarolik, ma’muriy va iqtisodiy ishlar bo‘yicha Andijon viloyati sudlari raislari tomonidan sayyor qabul o‘tkazildi. Unda Andijon va Izboskan tumanlarida istiqomat qiluvchi oltmishdan ortiq fuqaro hamda o‘ttizga yaqin diniy-ekstremistik oqimlar a’zosi bo‘lgan hamda jazoni o‘tash muassasalaridan ozod etilgan shaxslarning hal etilmayotgan, yechimini topa olmayotgan muammolari tinglandi. Sudlar fuqarolarning muammolarini qonuniy tartibda hal etish bo‘yicha o‘zlarining yordam va maslahatlarini berdi. Bu haqda jurnalist Umidjon Mamarasulov xabar bermoqda.
– Tumandagi 29-maktabgacha ta’lim muassasasida farrosh vazifasida ishlayman, — deydi Andijon tumani, Zavrok mahallasida yashovchi Dildoraxon Mo‘minova. – Ayrim sabablarga ko‘ra, Jinoyat ishlari bo‘yicha Andijon tumani sudining 2018-yil 20-fevraldagi hukmiga muvofiq Jinoyat Kodeksining 109-moddasi (qasddan badanga yengil shikast yetkazish) bilan 1 yilu 6 oy muddatga axloq tuzatish ishlarining 10 foiz jazosi tayinlangan. Qilmishimdan pushaymondaman. Shu sababli bugungi qabul davomida tayinlangan jazoni yanada yengillashtirib berishni, jazodan muddatidan ilgari ozod etishlarini so‘rab murojaat qildim.
Fuqaroni qabul qilgan Jinoyat ishlari bo‘yicha viloyat sudi raisi Vohidjon Nazarov tomonidan Andijon tuman ichki ishlar bo‘limi probatsiya guruhi katta inspektori kapitan K.Karimovga Dildoraxon Mo‘minovaga oid materialni qonuniy muddati kelishi bilan tuman sudiga qonuniy ko‘rib chiqish uchun taqdim etishi tayinlandi.
Andijon tumani Beshbo‘ynoq mahallasida yashovchi Adolatxon Ahmedova, to‘rt nafar farzandning onasi hisoblanadi. Yoshi qirqdan o‘tgan ayol o‘g‘rilik yo‘liga kirib qol. Jinoyat jazosiz qolmaydi deganlaridek sud hukmiga ko‘ra ikki yil muddatga shartli ravishda ozodlikdan marhum etilgan.
– Oilamiz qiyinchilik bilan hayot kechirmoqda, – deydi u. – Mavsumiy ishlarda ishlab, pul topaman. Biroq oilamni moddiy ta’minlashga bu yetmayapti. Shu tufayli ham oilamizda tez-tez turli nizolar kelib chiqmoqda. Yaqinda Rossiyada mehnat qilayotgan bir tanishim o‘zi ishlayotgan joyga, maoshi yuqori bo‘lgan ishni taklif qildi. Lekin belgilangan jazoning bir yarim yilini o‘taganiligim bois, menga qonunan xorijga chiqib ketish taqiqlanadi. Qabulda Jinoyat ishlari bo‘yicha viloyat sudi raisiga jazo muddatini qisqartirilishiga yordam berishini so‘rab murojaat qilgan edim, tegishli tushuntirishlar berildi.
Aropatxon Ne’matova esa, Budjetdan tashqari pensiya jamg‘armasi Andijon tuman bo‘limiga onasi Mavludaxon Akbayevaning ish stajini qo‘shib hisoblash to‘g‘risidagi arizasi ma’muriy sudning hal qiluv qaroriga ko‘ra qanoatlantirilgani, biroq pensiya tayinlanishida muammolar yuzaga kelayotganini bildirgan.
Andijon viloyat ma’muriy sudining raisi Otabek Mirzamahmudov ushbu masalani atroflicha o‘rganib chiqib, joyida hal etib berdi. Akbayevaga pensiya to‘liq tayinlanishi belgilandi.
Qabul davomida murojaatlar yuzasidan muammolarni hal etish bo‘yicha tegishli va mutasaddi idoralar vakillariga topshiriqlar berildi.
Izoh (0)