Messi va uning jamoadoshlari fransuz sherlariga qarshi. Barchasi “Lion”—“Barselona” uchrashuvi haqida (prevyu)

Bugun, 19-fevral kuni tungi soat 01:00 da Yevropa Chempionlar Ligasi 1/8 finali doirasida ikkita o‘yin bo‘lib o‘tadi. Ulardan birida musobaqaning doimiy favoritlaridan biri hisoblagan Kataloniyaning “Barselona” klubi Fransiyaning “Lion” klubi bilan bahs olib boradi. Quyida ushbu uchrashuvga oid ma’lumotlar va qiziqarli faktlar taqdim etiladi.

Musobaqa yo‘li

“Barselona”

Kataloniya klubi guruh bosqichida hech qanday muammoga duch kelganicha yo‘q. Leo Messi jamoadoshlari “Tottenhem”, “Inter” va “PSV Eyndxoven” klublaridan ustun kelib, o‘z guruhida 14 ochko to‘plab, 1-o‘rin bilan pley-offga chiqdi. Jamoa guruh bosqichidagi 6 ta o‘yindan 4 tasida g‘alaba qozondi, 2 tasida esa durang qayd etdi. “Inter” bilan “Tottenhem” esa so‘nggi turga qadar faqatgina 2-o‘rin uchun kurash olib bordi. Natijada omad “shporlar”ga kulib boqqani barchaga birdek ma’lum, nazarimizda.

“Lion”

“Lion”ning guruh bosqichidagi yo‘li esa bir muncha qiyin bo‘lganligini ta’kidlash joiz. Fransuz klubi “Manchester Siti”, “Shaxtyor” va “Hoffenhaym” bilan bitta guruhda pley-off yo‘llanmasi uchun kurash olib borib, u yerdan “omon” chiqa olgani esa tahsinga sazovor. Avvaliga hammasi yaxshi boshlangandi — “Lion” “Siti”ni 1-turda mag‘lub etgandi. Bu g‘alaba esa “sherlar” uchun yagonaligicha qoldi. Klub guruh bosqichidagi qolgan 5 ta o‘yinda durang qayd etdi. Ba’zi o‘yinlarda “Lion” g‘alabani qo‘ldan chiqargan bo‘lsa, ba’zilarida iroda ko‘rsatib, mag‘lubiyatdan qutulib qoldi. Fransuzlar so‘nggi turda “Shaxtyor” bilan ham durang qayd etib, guruhdan 2-o‘rin bilan pley-offga yo‘l ola bildi.

E’tiborga molik holatlar

• “Lion” guruh bosqichida “Manchester Siti”ga qarshi 2 marta o‘ynab, 4 ochkoga ega bo‘ldi. Bruno Jenezio shogirdlari Xosep Gvardiola jamoasini ikkala o‘yinda ham zararsizlantira olgani hurmatga loyiq. Shuning uchun ham 1/8 finali qur’asi “Barselona” uchun yoqimli keldi deb bo‘lmaydi. O‘tgan 10 yillikda “sherlar” kataloniyaliklar bilan 6 marta duch kelgan, biroq ularning bittasida ham g‘alaba qozona olmagan. Ikkita o‘yindagina durang qayd etishgan. Bugungi o‘yin “Lion” uchun yana bir imkoniyat bo‘lishi mumkin.
• “Lion”ning “Barselona”ga qarshi o‘yin oldidan eng katta yo‘qotishi, shubhasiz, bu — Nabil Fekir. “Sherlar” yetakchisi guruh bosqichining so‘nggi o‘yinida hal qiluvchi golni urish bilan birga, keraksiz sariq kartochkani ham olgandi. Shu boisdan u bugungi bahsni o‘tkazib yuboradi. Bruno Jenezio esa taktikaga ba’zi o‘zgartirishlar kiritishga majbur bo‘lishi tayin. Negaki, hozirgi “Lion”ni Fekirsiz tasavvur qilish bir muncha mushkul.

• “Barselona” ham o‘yin oldidan jiddiy yo‘qotishga uchragan. Jamoa yarim himoyasidan joriy mavsumda muqim o‘rin egallagan braziliyalik Artur jarohati sabab o‘yinda qatnasha olmaydi. Shuningdek, o‘yinlari sonidan jarohatlari ko‘p bo‘lgan Tomas Vermalen, uzoq muddatga safdan chiqqan Rafinya va Yasper Silessen ham bugungi o‘yinni o‘tkazib yuboradi. Jamoa yetakchisi Lionel Messining sog‘lig‘i esa joyida va u bellashuvga tayyor.

Qiziqarli faktlar

• “Lion” barcha musobaqalardagi so‘nggi 7 ta o‘yindan 6 tasida g‘alaba qozondi;
• “Lion” va “Barselona” ham Chempionlar Ligasi joriy mavsumida guruh bosqichidagi birorta o‘yinda mag‘lub bo‘lmadi;
• “Barselona” joriy mavsum barcha musobaqalardagi so‘nggi 4 ta safar o‘yinidan, atigi 1 tasida g‘alaba qozondi;
• “Lion” so‘nggi 7 ta o‘yindan , 5 tasida 2 tadan gol urdi;
• Ikkala klub o‘rtasidagi Chempionlar Ligasidagi so‘nggi 5 ta o‘yindan 4 tasida 3+ gol kiritilgan;
• Luis Suares joriy mavsum Chempionlar Ligasida gol ura olmadi;
• Lionel Messi “Lion”ga qarshi so‘nggi 4 ta o‘yinda 3 ta gol urdi.

Taxminiy tarkiblar

O‘yindan oldin fikrlar

“Manchester Siti” va “Barselona” — hujumkor jamoalar. Biz bir yo‘la ikki o‘yin uchun reja tuzamiz. “Barsa” tarkibida qoyilmaqom futbolchilar harakat qiladi. Usmon Dembele bilan Ferlan Mendi bemalol raqobatlashishi mumkin. Biz muvozanatni topa olishimiz kerak. Nabil Fekir —  bizning sardor va yetakchimiz. U maydonda bo‘lmaganda, bizga qiyin bo‘ladi. Fekir doim asosiy rolni o‘ynaydi. Bu yo‘qotishni qandaydir yo‘l bilan qoplashimiz kerak.Bruno Jenezio, “Lion” bosh murabbiyi

Chempionlar Ligasi — musobaqa og‘ir va shunchaki oddiy emas. Ammo biz jang uchun tayyormiz. Ushbu o‘yinni anchadan beri kutyapmiz. “Lion” o‘z maydonida juda kuchli. Ularning tarkibida ko‘plab ajoyib o‘yinchilar bor. “Lion”da menga nima yoqadi? Ular doim hujum qiladi. Ular bosim uyushtirib, bizga qarshi ham hujumkor o‘yin ko‘rsatadi deb o‘ylayman.

Ernesto Valverde, “Barselona” bosh murabbiyi

Internet ma’lumotlari asosiyda Asror Abdunazarov tayyorladi.