Бугун, 19 февраль куни тунги соат 01:00 да Европа Чемпионлар Лигаси 1/8 финали доирасида иккита ўйин бўлиб ўтади. Улардан бирида мусобақанинг доимий фаворитларидан бири ҳисоблаган Каталониянинг «Барселона» клуби Франциянинг «Лион» клуби билан баҳс олиб боради. Қуйида ушбу учрашувга оид маълумотлар ва қизиқарли фактлар тақдим этилади.
Мусобақа йўли
«Барселона»
Каталония клуби гуруҳ босқичида ҳеч қандай муаммога дуч келганича йўқ. Лео Месси жамоадошлари «Тоттенҳэм», «Интер» ва «ПСВ Эйндховен» клубларидан устун келиб, ўз гуруҳида 14 очко тўплаб, 1-ўрин билан плей-оффга чиқди. Жамоа гуруҳ босқичидаги 6 та ўйиндан 4 тасида ғалаба қозонди, 2 тасида эса дуранг қайд этди. «Интер» билан «Тоттенҳэм» эса сўнгги турга қадар фақатгина 2-ўрин учун кураш олиб борди. Натижада омад «шпорлар»га кулиб боққани барчага бирдек маълум, назаримизда.«Лион»
«Лион»нинг гуруҳ босқичидаги йўли эса бир мунча қийин бўлганлигини таъкидлаш жоиз. Француз клуби «Манчестер Сити», «Шахтёр» ва «Ҳоффенҳайм» билан битта гуруҳда плей-офф йўлланмаси учун кураш олиб бориб, у ердан «омон» чиқа олгани эса таҳсинга сазовор. Аввалига ҳаммаси яхши бошланганди — «Лион» «Сити»ни 1-турда мағлуб этганди. Бу ғалаба эса «шерлар» учун ягоналигича қолди. Клуб гуруҳ босқичидаги қолган 5 та ўйинда дуранг қайд этди. Баъзи ўйинларда «Лион» ғалабани қўлдан чиқарган бўлса, баъзиларида ирода кўрсатиб, мағлубиятдан қутулиб қолди. Французлар сўнгги турда «Шахтёр» билан ҳам дуранг қайд этиб, гуруҳдан 2-ўрин билан плей-оффга йўл ола билди.Эътиборга молик ҳолатлар
- «Лион» гуруҳ босқичида «Манчестер Сити»га қарши 2 марта ўйнаб, 4 очкога эга бўлди. Бруно Женезио шогирдлари Хосеп Гвардиола жамоасини иккала ўйинда ҳам зарарсизлантира олгани ҳурматга лойиқ. Шунинг учун ҳам 1/8 финали қуръаси «Барселона» учун ёқимли келди деб бўлмайди. Ўтган 10 йилликда «шерлар» каталонияликлар билан 6 марта дуч келган, бироқ уларнинг биттасида ҳам ғалаба қозона олмаган. Иккита ўйиндагина дуранг қайд этишган. Бугунги ўйин «Лион» учун яна бир имконият бўлиши мумкин.
- «Лион»нинг «Барселона»га қарши ўйин олдидан энг катта йўқотиши, шубҳасиз, бу — Набиль Фекир. «Шерлар» етакчиси гуруҳ босқичининг сўнгги ўйинида ҳал қилувчи голни уриш билан бирга, кераксиз сариқ карточкани ҳам олганди. Шу боисдан у бугунги баҳсни ўтказиб юборади. Бруно Женезио эса тактикага баъзи ўзгартиришлар киритишга мажбур бўлиши тайин. Негаки, ҳозирги «Лион»ни Фекирсиз тасаввур қилиш бир мунча мушкул.
- «Барселона» ҳам ўйин олдидан жиддий йўқотишга учраган. Жамоа ярим ҳимоясидан жорий мавсумда муқим ўрин эгаллаган бразилиялик Артур жароҳати сабаб ўйинда қатнаша олмайди. Шунингдек, ўйинлари сонидан жароҳатлари кўп бўлган Томас Вермален, узоқ муддатга сафдан чиққан Рафинья ва Яспер Силессен ҳам бугунги ўйинни ўтказиб юборади. Жамоа етакчиси Лионель Мессининг соғлиғи эса жойида ва у беллашувга тайёр.
Қизиқарли фактлар
- «Лион» барча мусобақалардаги сўнгги 7 та ўйиндан 6 тасида ғалаба қозонди;
- «Лион» ва «Барселона» ҳам Чемпионлар Лигаси жорий мавсумида гуруҳ босқичидаги бирорта ўйинда мағлуб бўлмади;
- «Барселона» жорий мавсум барча мусобақалардаги сўнгги 4 та сафар ўйинидан, атиги 1 тасида ғалаба қозонди;
- «Лион» сўнгги 7 та ўйиндан , 5 тасида 2 тадан гол урди;
- Иккала клуб ўртасидаги Чемпионлар Лигасидаги сўнгги 5 та ўйиндан 4 тасида 3+ гол киритилган;
- Луис Суарес жорий мавсум Чемпионлар Лигасида гол ура олмади;
- Лионель Месси «Лион»га қарши сўнгги 4 та ўйинда 3 та гол урди.
Тахминий таркиблар
«Лион»: Лопеш — Дюбуа, Марсело, Дeнaйер, Менди — Тузар, Ндомбеле — Траоре, Депай, Ауар — Дембеле
«Барселона»: тер Штеген — Семеду, Пике, Лангле, Алба — Ракитич, Бускетс, Коутиньо — Дембеле, Месси, Суарес
Ўйнамайди: Фекир, Гуйри — Рафинья, Силлессен, Артур.
Сўроқ остида: Дeнaйер, Ндомбеле — Вермален, Умтити.
Ўйиндан олдин фикрлар
«Манчестер Сити» ва «Барселона» — ҳужумкор жамоалар. Биз бир йўла икки ўйин учун режа тузамиз. «Барса» таркибида қойилмақом футболчилар ҳаракат қилади. Усмон Дембеле билан Ферлан Менди бемалол рақобатлашиши мумкин. Биз мувозанатни топа олишимиз керак. Набиль Фекир — бизнинг сардор ва етакчимиз. У майдонда бўлмаганда, бизга қийин бўлади. Фекир доим асосий ролни ўйнайди. Бу йўқотишни қандайдир йўл билан қоплашимиз керак.Бруно Женезио, «Лион» бош мураббийи
Чемпионлар Лигаси — мусобақа оғир ва шунчаки оддий эмас. Аммо биз жанг учун тайёрмиз. Ушбу ўйинни анчадан бери кутяпмиз. «Лион» ўз майдонида жуда кучли. Уларнинг таркибида кўплаб ажойиб ўйинчилар бор. «Лион»да менга нима ёқади? Улар доим ҳужум қилади. Улар босим уюштириб, бизга қарши ҳам ҳужумкор ўйин кўрсатади деб ўйлайман.Эрнесто Вальверде, «Барселона» бош мураббийи
Европа Чемпионлар Лигаси
19 февраль, сешанба
«Лион»—«Барселона» 01:00
Бош ҳакам: Жунейт ЧақирЯнада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)