Андижон туманидаги Бахт маҳалласида жиноят, фуқаролик, маъмурий ва иқтисодий ишлар бўйича Андижон вилояти судлари раислари томонидан сайёр қабул ўтказилди. Унда Андижон ва Избоскан туманларида истиқомат қилувчи олтмишдан ортиқ фуқаро ҳамда ўттизга яқин диний-экстремистик оқимлар аъзоси бўлган ҳамда жазони ўташ муассасаларидан озод этилган шахсларнинг ҳал этилмаётган, ечимини топа олмаётган муаммолари тингланди. Судлар фуқароларнинг муаммоларини қонуний тартибда ҳал этиш бўйича ўзларининг ёрдам ва маслаҳатларини берди. Бу ҳақда журналист Умиджон Мамарасулов хабар бермоқда.
– Тумандаги 29-мактабгача таълим муассасасида фаррош вазифасида ишлайман, — дейди Андижон тумани, Заврок маҳалласида яшовчи Дилдорахон Мўминова. – Айрим сабабларга кўра, Жиноят ишлари бўйича Андижон тумани судининг 2018 йил 20 февралдаги ҳукмига мувофиқ Жиноят Кодексининг 109-моддаси (қасддан баданга енгил шикаст етказиш) билан 1 йилу 6 ой муддатга ахлоқ тузатиш ишларининг 10 фоиз жазоси тайинланган. Қилмишимдан пушаймондаман. Шу сабабли бугунги қабул давомида тайинланган жазони янада енгиллаштириб беришни, жазодан муддатидан илгари озод этишларини сўраб мурожаат қилдим.
Фуқарони қабул қилган Жиноят ишлари бўйича вилоят суди раиси Воҳиджон Назаров томонидан Андижон туман ички ишлар бўлими пробация гуруҳи катта инспектори капитан К.Каримовга Дилдорахон Мўминовага оид материални қонуний муддати келиши билан туман судига қонуний кўриб чиқиш учун тақдим этиши тайинланди.
Андижон тумани Бешбўйноқ маҳалласида яшовчи Адолатхон Аҳмедова, тўрт нафар фарзанднинг онаси ҳисобланади. Ёши қирқдан ўтган аёл ўғрилик йўлига кириб қол. Жиноят жазосиз қолмайди деганларидек суд ҳукмига кўра икки йил муддатга шартли равишда озодликдан марҳум этилган.
– Оиламиз қийинчилик билан ҳаёт кечирмоқда, – дейди у. – Мавсумий ишларда ишлаб, пул топаман. Бироқ оиламни моддий таъминлашга бу етмаяпти. Шу туфайли ҳам оиламизда тез-тез турли низолар келиб чиқмоқда. Яқинда Россияда меҳнат қилаётган бир танишим ўзи ишлаётган жойга, маоши юқори бўлган ишни таклиф қилди. Лекин белгиланган жазонинг бир ярим йилини ўтаганилигим боис, менга қонунан хорижга чиқиб кетиш тақиқланади. Қабулда Жиноят ишлари бўйича вилоят суди раисига жазо муддатини қисқартирилишига ёрдам беришини сўраб мурожаат қилган эдим, тегишли тушунтиришлар берилди.
Аропатхон Неъматова эса, Бюджетдан ташқари пенсия жамғармаси Андижон туман бўлимига онаси Мавлудахон Акбаеванинг иш стажини қўшиб ҳисоблаш тўғрисидаги аризаси маъмурий суднинг ҳал қилув қарорига кўра қаноатлантирилгани, бироқ пенсия тайинланишида муаммолар юзага келаётганини билдирган.
Андижон вилоят маъмурий судининг раиси Отабек Мирзамаҳмудов ушбу масалани атрофлича ўрганиб чиқиб, жойида ҳал этиб берди. Акбаевага пенсия тўлиқ тайинланиши белгиланди.
Қабул давомида мурожаатлар юзасидан муаммоларни ҳал этиш бўйича тегишли ва мутасадди идоралар вакилларига топшириқлар берилди.
Изоҳ (0)