Sog‘liqni saqlash vazirligi lavozimlari ro‘yxatiga “O‘zbekiston Respublikasi Bosh psixiatri” va “O‘zbekiston Respublikasi Bosh suitsidologi” lavozimlari kiritiladi. Bu Prezidentning “2019—2025- yillarda O‘zbekiston Respublikasi aholisining ruhiy salomatligini muhofaza qilish xizmatini rivojlantirish konsepsiyasini tasdiqlash to‘g‘risida”gi qarorida ko‘zda tutilgan.
Qaror bilan mazkur konsepsiya va uni amalga oshirish chora-tadbirlari tasdiqlandi.
Ruhiy holati buzilgan shaxslar ularga psixiatriya yordami ko‘rsatilishi vaqtida davlat tizimi doirasida bepul yuridik yordam olish huquqiga ega ekanligi belgilab qo‘yildi.
Sog‘liqni saqlash vazirligiga:
Psixiatriya yordamini olish imkoniyati, uning samaradorligi va sifatini oshirish, ruhiy holatlar buzilishining ijtimoiy va iqtisodiy yukini kamaytirish, shuningdek, aholining ko‘rsatilayotgan davolash-diagnostika va tibbiy-reabilitatsiya yordamidan to‘liq qoniqish hosil qilishiga erishish maqsadida aholining ruhiy salomatligini muhofaza qilish xizmati faoliyatini yanada maqbullashtirish yuzasidan ta’sirchan choralar ko‘rish;
Innovatsion sog‘liqni saqlash milliy palatasi bilan birgalikda birlamchi tibbiy-sanitariya yordami muassasalari amaliyotiga ruhiy holatlar buzilishiga tashxis qo‘yish va ularni davolash klinik protokollarini joriy etish;
Ruhiy holati buzilgan shaxslarni zamonaviy yuqori samarali dori vositalari bilan ta’minlash bo‘yicha choralar ko‘rish;
Ish vaqtini xronometrajdan o‘tkazish orqali aholiga psixiatriya yordami ko‘rsatishda ishtirok etadigan mutaxassislar ish hajmi normativlarini kelgusida shtat normativlariga o‘zgartishlar kiritgan holda qayta ko‘rib chiqish topshirildi.
Izoh (0)