Oliy Majlis Qonunchilik palatasi deputatlari ishtirokidagi respublika ishchi guruhi Navoiy viloyatida bo‘lib, tibbiyot sohasidagi ahvolni o‘rganish, mavjud muammolarni tahlil qilish va ularni joyida bartaraf etish masalasiga e’tibor qaratmoqda. Bu haqda O‘zA xabar berdi.
Ishchi guruhi a’zolari Konimex tuman sanitariya-epidemiologiya xizmati bo‘limi faoliyati bilan yaqindan tanishdi. O‘rganishlar jarayonida mazkur muassasaning faoliyatidagi kamchiliklar yaqqol ko‘zga tashlandi.
— O‘rganish jarayonida Konimex tuman sanitariya-epidemiologiya xizmati bo‘limi rahbari va uning o‘rinbosarini topishning iloji bo‘lmadi, — deydi Qonunchilik palatasi deputati Jamshid Pirmatov. — Mazkur muassasada 40 dan ortiq xodim ishlaydi. Ammo muassasa faoliyati bilan tanishish chog‘ida xodimlardan bor-yo‘g‘i besh nafarini ish joyida uchratdik. Muassasadagi tozalik ishlari umuman talabga javob bermaydi. Vaksina saqlash qoidalari risoladagidek emas. Bu muassasaning qanday faoliyat ko‘rsatayotganidan dalolatdir.
Keyingi manzil Konimex tumani Zafarobod qo‘rg‘onidagi 35-sonli qishloq oilaviy poliklinikasi bo‘ldi. O‘rganish jarayonida o‘z yechimini kutayotgan bir qator kamchiliklar aniqlandi.
Bugungi kunda 5600 nafardan ortiq fuqaroga tibbiy xizmat ko‘rsatib kelayotgan mazkur muassasada pediatriya va terapevt vrachlar yetishmaydi. Poliklinika binosi ta’mirtalab. Tuman tibbiyot birlashmasi rahbari bergan ma’lumotga ko‘ra, mazkur tibbiyot muassasasini ta’mirlash bo‘yicha viloyat va tuman hokimligiga bir necha bor murojaat qilingan, ammo amaliy ishlardan haligacha darak yo‘q.
Ishchi guruhi a’zolari tomonidan aniqlangan bu kabi muammolar xalq deputatlari Navoiy viloyat sessiyasi ishida ko‘riladigan bo‘ldi.
Izoh (0)