“Millionlar o‘yini” — “El-Klasiko”: “Real” bugun “Barselona”ga qarshilik ko‘rsata oladimi? (prevyu)

Bugun, 6-fevral kuni Barselonada Ispaniyaning ikki azaliy raqib jamoalari o‘rtasida mamlakat kubogi yarim finalining dastlabki to‘qnashuvi bo‘lib o‘tadi.

Na “Barselona” va na “Real” Ispaniya Kubogi yarim finalida o‘zaro duch kelishni xohladi. Ammo taqdir ularni yana uchrashtirib qo‘ya qoldi. Ikkala jamoa ham tig‘iz taqvim sabab ham finaldan oldin bir-biriga duch kelishni xohlamagandi. Masalan, “Barselona” bilan o‘yindan so‘ng “Real”ni ikki safar o‘yini kutib turibdi. Raqiblar esa anoyi emas —  “Atletiko Madrid” va “Ayaks”. Kataloniyaliklar esa o‘z o‘rnida 19-fevraldan 2-martga qadar o‘ta murakkab 4 ta safar uchrashuvini o‘tkazishi kerak. Jumladan, klub mazkur vaqt oralig‘ida “Lion”, “Sevilya” va ikki bor “Real” (biri kubok javob o‘yini bo‘lsa, biri La Liga doirasida) mehmoni bo‘ladi. Havas qilib bo‘lmas taqvim-a, shunday emasmi, aziz muxlis?

Bu klublar uchun qanchalik muammo bo‘lsa, futbol muxlislari uchun yana qo‘shimcha bayram. Tort ustidagi olcha misoli. So‘nggi “El-Klasiko” yodingizdami? Ha, to‘g‘ri esladingiz. “Real” bugun mehmon bo‘ladigan “Kam Nou”da sharmandali hisobda (5:1) mag‘lub bo‘lgan, oxir-oqibatda esa murabbiysiz qolgandi. Eng qizig‘i, “Barselona” mazkur g‘alabaga Lionel Messisiz erishgandi. Xulen Lopetegi bo‘lsa yirik hisobdagi mag‘lubiyat sabab Madriddan badarg‘a qilindi. Uning o‘rniga esa “qutqaruvchi” rolini bajarishi lozim bo‘lgan Santyago Solari olib kelindi. Xo‘sh, o‘sha mag‘lubiyatdan so‘ng “Real”da nimalar o‘zgardi?

Katta ehtimol bilan ushbu o‘yindagi avvalgisida bo‘lgani kabi yirik hisob qayd etilmasligi mumkin. “Qirollik klubi”ning yangi bosh murabbiyi Santyago Solari klubga yana g‘oliblik ruhini qaytara oldi. Ko‘pchilik hozirda “Real” Solari qo‘l ostida kuchli va jiddiy raqiblarga qarshi o‘yin o‘tkazmaganligi haqida bong urmoqda. Biroq Zidan va Ronaldu tark etgan “Real”da biroz o‘sish kuzatilganini tan olmaslik ham — deyarli ahmoqlik. “Real”dan yana qo‘rqishmoqda va uni hurmat qilishda davom etishmoqda. Bunda esa Solarining xizmatlari beqiyos.

Bugun esa Santyago “Kamp Nou”ga ilk bor “Real” bosh murabbiyi sifatida keladi va o‘z tarixini yozishni boshlaydi. Bugungi o‘yin uning uchun o‘ta muhim ekanligini sira shubha qilmasa bo‘ladi, Solari esa g‘alaba uchun borini berishini rad etib bo‘lmaydi. Argentinalik oldinda kutib turgan qiyin safar o‘yinlari (“Atletiko Madrid” va “Ayaks”ga qarshi) haqida o‘ylamaydi va o‘yinga katta kuchni tashlaydi. “Barselona” bosh murabbiyi Ernesto Valverdega keladigan bo‘lsak, jamoaning ilk uchrashuvni “Nou Kamp”da o‘tkazayotganligi biroz bosimni yuzaga keltirishi mumkin. Boisi oldinda javob uchrashuvi, u esa “Santyago Bernabeu”da bo‘ladi. Agarda hammasi aksincha bo‘lganida Valverde Madridda rotatsiyaga qo‘l urish va asosiy kuchni javob o‘yiniga olib qo‘yish imkoniyatga ega bo‘lardi. Bugun esa buning aslo ilojisi yo‘qdek.

Bugun kimlar maydonda bo‘ladi?

Kadrlar masalasi haqida gap ketganda  “Real”da hammasi allaqachon ma’lum bo‘lgandek. Boisi kubok bahslarida “Real” darvozasini Keylor Navas qo‘riqlashi aniq. Qanotlarda esa La Liganing 22-turida dam olgan Dani Karvaxal va Marselolar harakatlanishi kutilmoqda. Markazda esa Ramos—Varan tandemi. Yarim himoya uchligini esa o‘sha eski trio: Toni Kroos—Luka Modrich—Kazemiro tashkil qiladi. Hujumda so‘nggi o‘yinlarda tinmasdan gollar urayotgan Karim Benzemaning bo‘lishi aniq. Qanotlarda esa Lukas Vaskes, Garet Beyl yoki Vinisus Juniorni ko‘rishimiz mumkin bo‘ladi. Vaskes haqida gap ketar ekan, u Solari qo‘l ostida muhim o‘yinchilardan biriga aylandi. Bugungi bahsni uning asosiy tarkibda boshlashi va Beylning zaxirada qolishi haqiqatga yaqinroq. Boisi  Vaskesda hech qanday charchoq alomati va qiynayotgan eski jarohatlar yo‘q. Lukas ham hujumda harakatlanishi va himoyaga qaytib yordam berishi mumkin. U bugun katta ehtimol bilan Jordi Albani zararsizlantirish bilan shug‘ullanadi.

“Barselona” tarkibi haqida gaplashadigan bo‘lsak, Kataloniya klubida bir qancha muammolar borligi ayni haqiqat. Valverdening asosiy muammolari esa Messining kichik jarohati hamda Dembelening shishib ketgan anginasi. Usmonning maydonga tushmasligi aniq. U o‘yin qaydnomasiga ham kiritilmagan. Leoning masalasi esa bugunning o‘zida hal bo‘ladi. Har holda uning maydonga tushishi ehtimol mavjud. Ernesto esa avvalroq intervyularning birida Messi borasida tavakkal qilmasligini ma’lum qilgandi. Ammo orada maydonga tushish yoki tushmaslikni Messining o‘zi hal qilishi haqida xabarlar paydo bo‘ldi. Hammasini sanoqli soatlardan so‘ng bilib olamiz. Boshqa pozitsiyalarda esa deyarli shubha-gumonga o‘rin yo‘q. Hujum triosini Filippe Koutinyo—Luis Suares—Karlos Alenya tashkil qilishi mumkin. Yaqindagina jamoaga kelib qo‘shilgan Kevin-Prins Boatengning ham maydonga tushish ehtimoli yo‘q emas. Katta pullar evaziga olingan Malkom haqida bunday gaplarni aytib bo‘lmaydi. U na jamoa rahbariyatining va na Valverdening ishonchini qozona oldi. Xullas, u bugun maydonga tushishidan ko‘ra tushmasligining ehtimoli katta.

Taxminiy tarkiblar:

Jamoalarning so‘nggi o‘yinlari:

• 25.10.18, La Liga, “Barselona” — “Real” 5:1
• 06.05.18, La Liga, “Barselona” — “Real” 2:2
• 23.12.17, La Liga, “Real” — “Barselona” 0:3
• 17.08.17, Ispaniya Superkubogi, “Real” — “Barselona” 2:0
• 13.08.17, Ispaniya Superkubogi, “Barselona” — “Real” 1:3

Jarohat olganlar: Rafinya, Yasper Silessen, Umtiti, Dembele — Valyexo

So‘roq ostida — Messi

Qiziq faktlar

• “Real” va “Barselona” oxirgi o‘zaro 27 ta o‘yinning 24 tasida 3 tadan kam gol urmayapti.
• “Real” Ispaniya Kubogidagi so‘nggi 38 ta o‘yinning 34 tasida yutqazmadi.
• “Real”ga qarshi so‘nggi 3 ta o‘yinda “Barselona” kamida 2 tadan gol urgan.