MB: Toshkent shahar hokimligi tomonidan “Poytaxt bank” ta’sis etilishi qonunchilik talablarining buzilishi hisoblanmaydi

Toshkent shahar hokimligi tomonidan “Poytaxt bank” ta’sis etilishi bank qonunchiligi talablarining buzilishi hisoblanmaydi. Bu haqda Markaziy bank raisining birinchi o‘rinbosari Timur Ishmetov ma’lum qildi, deya xabar beradi “Gazeta.uz”.

Avvalroq Uzmetronom.com nashri “Banklar va bank faoliyati to‘g‘risida”gi qonunga ko‘ra, yuridik va jismoniy shaxslar, shu jumladan chet ellik yuridik va jismoniy shaxslar bank muassislari bo‘lishi mumkin, basharti, qonun hujjatlarida boshqacha tartib nazarda tutilgan bo‘lmasa, davlat hokimiyati organlari, jamoat birlashmalari va jamoat fondlari bundan mustasno ekaniga e’tibor qaratgan edi.

Timur Ishmetov “qonun hujjatlarida boshqacha tartib nazarda tutilmagan bo‘lsa”, degan jumlaga e’tibor qaratib, davlat boshqaruv organlari ham muassis bo‘la olishini ma’lum qildi.

“2017-yilda shu bo‘yicha Prezident qarori qabul qilingan edi. Bu avvalgi hokim davrida edi, ya’ni bu hozirgi hokimlik tashabbusi emas. Bir yarim yil qaror talabi hokimlikda mablag‘ yo‘qligi sababli ijro etilmadi. Hozir, eng kam miqdordagi ustav kapital to‘planganidan so‘ng bankni ochishdi. Qonunchilik nuqtai nazaridan bu yerda qonun buzilishi holatlari yo‘q”, — dedi MB raisining birinchi o‘rinbosari.

U Markaziy bank bank rahbariyati oldiga kuzatuv kengashi tarkibini qayta ko‘rib chiqish talabini qo‘yganini aytib o‘tdi.

“Boshqaruv tarkibi bo‘yicha savollarimiz yo‘q. Bank kengashi masalasida esa uni to‘liq qayta ko‘rib chiqishni talab qildik. U asosan hokimlik xodimlaridan tarkib topgan, — dedi Timur Ishmetov. — Biz kuzatuv kengashining yarmidan ko‘pi davlat xizmatchisi bo‘lmagan va hokimlik bilan hech qanday aloqadorligi yo‘q, bank sohasida tajribaga, tegishli malakaga ega shaxslardan tarkib topishi lozimligini talab qildik”.

“Poytaxt bank” rahbariyati qisqa vaqt ichida kengashning yangi tarkibini taqdim etishni rejalashtirgan.

“Poytaxt bank” 2018-yil 29-dekabr kuni litsenziyaga ega bo‘lib, o‘z faoliyatini 10-yanvar kuni boshladi. Bank ustav kapitali 100 foiz poytaxt hokimligi mablag‘lari hisobidan shakllantirilib, 100 milliard so‘mni tashkil etadi.