Тошкент шаҳар ҳокимлиги томонидан «Пойтахт банк» таъсис этилиши банк қонунчилиги талабларининг бузилиши ҳисобланмайди. Бу ҳақда Марказий банк раисининг биринчи ўринбосари Тимур Ишметов маълум қилди, дея хабар беради «Газета.uz».
Аввалроқ Uzmetronom.com нашри «Банклар ва банк фаолияти тўғрисида»ги қонунга кўра, юридик ва жисмоний шахслар, шу жумладан чет эллик юридик ва жисмоний шахслар банк муассислари бўлиши мумкин, башарти, қонун ҳужжатларида бошқача тартиб назарда тутилган бўлмаса, давлат ҳокимияти органлари, жамоат бирлашмалари ва жамоат фондлари бундан мустасно эканига эътибор қаратган эди.
Тимур Ишметов «қонун ҳужжатларида бошқача тартиб назарда тутилмаган бўлса», деган жумлага эътибор қаратиб, давлат бошқарув органлари ҳам муассис бўла олишини маълум қилди.
«2017 йилда шу бўйича Президент қарори қабул қилинган эди. Бу аввалги ҳоким даврида эди, яъни бу ҳозирги ҳокимлик ташаббуси эмас. Бир ярим йил қарор талаби ҳокимликда маблағ йўқлиги сабабли ижро этилмади. Ҳозир, энг кам миқдордаги устав капитал тўпланганидан сўнг банкни очишди. Қонунчилик нуқтаи назаридан бу ерда қонун бузилиши ҳолатлари йўқ», — деди МБ раисининг биринчи ўринбосари.
У Марказий банк банк раҳбарияти олдига кузатув кенгаши таркибини қайта кўриб чиқиш талабини қўйганини айтиб ўтди.
«Бошқарув таркиби бўйича саволларимиз йўқ. Банк кенгаши масаласида эса уни тўлиқ қайта кўриб чиқишни талаб қилдик. У асосан ҳокимлик ходимларидан таркиб топган, — деди Тимур Ишметов. — Биз кузатув кенгашининг ярмидан кўпи давлат хизматчиси бўлмаган ва ҳокимлик билан ҳеч қандай алоқадорлиги йўқ, банк соҳасида тажрибага, тегишли малакага эга шахслардан таркиб топиши лозимлигини талаб қилдик».
«Пойтахт банк» раҳбарияти қисқа вақт ичида кенгашнинг янги таркибини тақдим этишни режалаштирган.
«Пойтахт банк» 2018 йил 29 декабрь куни лицензияга эга бўлиб, ўз фаолиятини 10 январь куни бошлади. Банк устав капитали 100 фоиз пойтахт ҳокимлиги маблағлари ҳисобидан шакллантирилиб, 100 миллиард сўмни ташкил этади.
Изоҳ (0)