Toshkent viloyati Bekobod shahar tibbiyot birlashmasining gemodializ bo‘limi foydalanishga topshirildi. Bu haqda O‘zA xabar berdi.
Shu munosabat bilan tashkil etilgan tadbirda viloyat hokimligi, sog‘liqni saqlash boshqarmasi mas’ullari, tibbiyot xodimlari, keng jamoatchilik vakillari ishtirok etdi.
Mamlakat sog‘liqni saqlash tizimida amalga oshirilayotgan tizimli islohotlar aholiga ko‘rsatilayotgan tibbiy xizmat sifatini oshirish, salomatligini yanada mustahkamlashda muhim omil bo‘lib xizmat qilayotgani ta’kidlandi.
Viloyat sog‘liqni saqlash boshqarmasi ma’lumotlariga ko‘ra, ayni paytda viloyatda 430 nafardan ortiq, jumladan, Bekobod shahri va tumanida 60 nafar surunkali buyrak xastaligi va buyrak yetishmovchiligi bilan og‘rigan bemor bo‘lib, shu paytga qadar ular poytaxtimiz va viloyat markazida joylashgan nefrologiya va gemodializ bo‘limlariga qatnashga majbur bo‘lgan.
Shaharning “Metallurg” shifoxonasida ish boshlagan mazkur bo‘limga 10 o‘rinli suv tozalash moslamasi, 5 ta “sun’iy buyrak” apparati o‘rnatilib, bemorlarga xizmat ko‘rsatishga shay holatga keltirildi.
Ma’lumotlarga ko‘ra, o‘tgan qisqa vaqtda viloyatga budjet mablag‘lari asosida 1 ta sun’iy suv tozalash moslamasi va 10 ta “sun’iy buyrak” apparati ajratilgan. Bundan tashqari, ichki imkoniyatlar va homiylik mablag‘lari hisobidan viloyatdagi bir necha shifo maskani, jumladan, Chirchiq shahridagi gemodializ bo‘limi 2 ta, Olmaliq shahar tibbiyot birlashmasi 3 ta “sun’iy buyrak” apparati bilan ta’minlangan.
Izoh (0)