Asia Alliance Bank aksiyadorlik tijorat bankining 100 foiz aksiyalari O‘zbekiston Respublikasi Xususiylashtirilgan korxonalarga ko‘maklashish va raqobatni rivojlantirish Davlat qo‘mitasi tasarrufiga o‘tdi. Endi O‘zbekistonda davlat banklari beshta bo‘ldi. Bu haqda “Gazeta.uz” xabar berdi.
Bankning 45 foiz aksiyalari davlat tomonidan o‘tgan yilning oktabr oyida sotib olingan. Bank aksiyalar emissiyasini o‘tkazdi va davlat muassasalari ko‘rinishida yangi aksiyadorlarni jalb qildi.
Korporativ ma’lumotlar yagona portalida berilgan ma’lumotlarga ko‘ra, 21-dekabr kuni muddatidan avval bank kengashi va reviziya komissiyasining vakolati tugatilgan hamda yangi a’zolar saylangan edi.
Avvalroq kengash xususiy kompaniyalar vakillari — Next Tech Energy B.V., Gor Investment Limited, Musaffo Niyat, Central Asian Engineering vakolatxonalarining rahbarlari va menejerlaridan iborat edi.
Endi kengash tarkibidan Vazirlar Mahkamasi, Raqobat qo‘mitasi, Moliya vazirligi hamda Iqtisodiyot vazirligi (Iqtisodiyot va sanoat vazirligiga aylantiriladi)qoshidagi davlat va xususiy hamkorlikni rivojlantirish Agentligi vakillari joy olgan. Reviziya komissiyasi a’zolari ham to‘liq davlat muassasalari vakillaridan tarkib topgan.
Musaffo Niyat vakili mazkur kelishuvni maxfiyligi bois uni sharhlashdan bosh tortdi, ammo u mazkur kelishuv tomonlarning roziligi bilan amalga oshirilganligini qayd etdi.
Vazirlar Mahkamasining 27-dekabrdagi farmoyishi bilan 2017-yil natijalariga ko‘ra 27,48 milliard so‘m miqdordagi dividendlarni bank ustav kapitalini oshirishga yo‘naltirish to‘g‘risida qaror qabul qilingan.
Avvalroq ustav kapitali 140 milliard so‘mni tashkil qilib, har biri 250 so‘m bo‘lgan 560 million dona oddiy aksiyalarga bo‘lingan edi. Endilikda ustav kapital miqdori 167,48 milliard so‘mni tashkil qiladi.
O‘zbekiston prezidenti dekabrda parlamentga qilgan murojaatida bank tizimida davlat ulushining yuqori darajada ekanligi mamlakat bank tizimining asosiy muammosi ekanligini qayd etgandi (banklarning 83% kapitali davlatga tegishli).
“Bu bank sektoridagi sog‘lom raqobatga to‘sqinlik qiladi va ko‘rsatilayotgan xizmatlar sifatiga salbiy ta’sir ko‘rsatadi”, — degan edi prezident. “Biz bank tizimiga xususiy va chet el kapitali oqimi evaziga davlat banklari ulushini kamaytiramiz”, — degan edi u.
Izoh (0)