Farg‘onada Sharqiy harbiy okrug ma’naviyat va ma’rifat markazida 14-yanvar – Vatan himoyachilari kuniga bag‘ishlangan bayram tadbiri bo‘lib o‘tdi. Unda senator va deputatlar, Sharqiy harbiy okrug qo‘shinlari qo‘mondonligi va unga qarashli harbiy qismlar, davlat xavfsizlik xizmati, huquqni muhofaza qiluvchi organlar rahbarlari, keng jamoatchilik vakillari ishtirok etdi. Bu haqda “Daryo” muxbiri Azizjon Ermatov xabar berdi.
Farg‘ona viloyati hokimi, Oliy Majlis Senati a’zosi Shuhrat G‘aniyev barcha harbiylarni bayram bilan samimiy tabrikladi.
“Vatanga xizmat haqiqiy er yigitning burchidir. Prezidentimizning bayram tabrigida qayd etib o‘tilganidek, biz ana shunday mard va jasur, el-yurtga sadoqatli o‘g‘lonlarimiz bilan haqli ravishda faxrlanamiz. Aynan sizlarning sa’y-harakatlaringiz bilan O‘zbekiston milliy armiyasi jadal rivojlanmoqda, uning jangovar qobiliyati va tayyorgarligi izchil oshib bormoqda. Mamlakatimizning mudofaa qudrati, xalqimizning tinch-osoyishta hayoti mustahkamlanmoqda. Viloyatimizda ham harbiy-ma’muriy sektor faoliyatini samarali yuritishda barcha imkoniyatlar ishga solinmoqda. O‘tgan davrda harbiylarimiz uchun viloyatda 180 xonadondan iborat 6 ta ko‘p qavatli uylarning foydalanishga topshirilgani diqqatga sazovordir. Bu kabi islohotlar ko‘lami 2019-yilda yanada kengayadi”, – dedi Shuhrat G‘aniyev.
Prezident farmoniga ko‘ra bayram arafasida Vatan himoyachilari kuni va O‘zbekiston Qurolli Kuchlarining 27 yilligi munosabati bilan huquqni muhofaza qilish organlari, mudofaa va favqulodda vaziyatlar vazirliklari xodimlaridan bir guruhi mukofotlandi.
Tantanali tadbirda farg‘onalik harbiylarga davlat mukofotlari – orden va medallarni O‘zbekiston Mudofaa vazirining birinchi o‘rinbosari Pavel Ergashev tantanali ravishda topshirdi.
Mudofaa vazirligining buyrug‘i bilan bir guruh soha vakillariga harbiy unvonlar, ko‘krak nishonlari topshirildi. Vazirlik miqyosida o‘tkazilgan turli ko‘rik-tanlov g‘oliblari taqdirlandi.
San’at ustalari, turli ansambllar, taniqli xonandalar tomonidan harbiy-vatanpavarlik konsert dasturi namoyish etildi.
Izoh (0)