Navoiy viloyati bojxona boshqarmasi tomonidan huquqni muhofaza qiluvchi idoralar vakillari bilan hamkorlikda Karmana tumanida o‘tkazilgan tezkor tadbir davomida fuqaro B.F.ning qilmishlariga chek qo‘yildi. Bu haqda “Daryo”ga Bojxona qo‘mitasi axborot xizmati bosh inspektori Husan Tangriyev ma’lum qildi.
Ushbu shaxs og‘irligi 5,2 kilogramm, 2 turdagi 6300 donadan ortiq pirotexnika vositasini 6,7 million so‘mga sotayotgan vaqtda fosh qilindi.
Shundan so‘ng mazkur qonunbuzarlik holatini ildizi bilan bartaraf etish maqsadida tezkor tadbir davom ettirildi. Mazkur qilmishlarning bir uchi G‘ijduvon tumaniga borib taqaldi.
Tezkor tadbir davomida ushbu tumanda istiqomat qiluvchi fuqaroR.J.7,7 kilogrammdan ortiq og‘irlikdagi va 2 turdagi pirotexnika vositasini sotishga uringan vaqtida ashyoviy dalillar bilan qo‘lga olindi.Qonunbuzardan olib qo‘yilgan 9005 dona pirotexnika vositasining umumiy qiymati 10 million so‘mni tashkil qilar ekan.
Hozirda ushbu holat yuzasidan tegishli hujjatlar rasmiylashtirilib, surishtiruv ishlari olib borilmoqda.
Ma’lumot uchun, joriy yil davomida bojxona xodimlari tomonidan huquqni muhofaza qiluvchi boshqa idoralar vakillari bilan hamkorlikda pirotexnika buyumlarining qonunga xilof muomalasi bilan bog‘liq 135 ta qonunbuzarlik holati aniqlandi. 371,1 million so‘mlik 161 ming donadan ortiq pirotexnika vositasining noqonuniy ravishda olib o‘tilishining oldi olindi.
Izoh (0)