“O‘zavtosanoat” raisi o‘rinbosari Umidjon Salimov mamlakat avtomobil sanoati raqobatdan qo‘rqmasligini ma’lum qildi. Bu haqda Spot xabar berdi.
“O‘zavtosanoat” tarkibiga kiruvchi mahsulotlar hatto import avtomobillariga bojxona to‘lovlari pasaytirilgan taqdirda ham raqobatbardosh bo‘lib qoladi.
Bu haqda 28-dekabrda bo‘lib o‘tgan matbuot anjumani davomida “O‘zavtosanoat” boshqaruv raisining rivojlanish va marketing bo‘yicha o‘rinbosari Umidjon Salimov ma’lum qildi.
Mahsulot raqobatbardoshliligiga chegirma va o‘tkazilayotgan aksiyalar ham yordam beradi.
“Biz uchun eng muhimi — dunyoning yetakchi ishlab chiqaruvchilari qatorida bo‘lish. Agar oldin bitta avtomobilni ishlab chiqarishga 50 soat vaqt sarflangan bo‘lsa (dunyo ko‘rsatkichlari bu borada 22-23 soatni tashkil qiladi), hozir Asakadagi zavodda bu ko‘rsatkich 25 soatdan oshmaydi”, — deydi kompaniya vakili.
Avtosanoatda yangi mexanizmlar joriy etilmoqda. Masalan hozirda korxonalar Just in time tizimida ishlamoqda. Bu esa butlovchi qismlar konveyerga aniq vaqtda yetkaziladi degani.
Yil boshida kompaniya 170 ming dona yengil avtomobil ishlab chiqarishni reja qilgan bo‘lsa, aholi talabi ortishi bilan raqam 220 ming donaga yetkazildi. O‘tgan yil ishlab chiqarish ko‘satkichi 140 ming dona avtomobilni tashkil qilgan.
“6 oyda ishlab chiqarish hajmini 50 ming dona avtomobilga yetkazish juda murakkab vazifa. Mavjud resurslar, shuningdek KPI kabi yangi faoliyat yo‘nalishlari joriy etilganligi sabab buni amalga oshirishning imkoni bo‘ldi. Keyingi yil kompaniya oldiga 250 ming dona avtomobil ishlab chiqarishni maqsad qildi”, — deydi Salimov.
“O‘zavtosanoat” yil yakunlariga bag‘ishlangan yig‘ilishda kompaniya vakillari korporativ madaniyat, ishlab chiqarish jaryonlarining savdo va xizmat ko‘rsatish bilan integrallashuvi, “Kaydzen” falsafasining qo‘llanilishi, biznes jarayonlarining samaradorligini oshirish jarayonlari haqida so‘zlab berdi.
Bundan tashqari SAP tizimi joriy etila boshlangan bo‘lib, bu ikki bosqichda amalga oshiriladi. Birinchi bosqichda tizim GM Uzbekistan va dilerlik korxonalarida joriy etiladi, ikkinchi bosqichda — barcha boshqa korxonalarda. Buning natijasida ishlab chiqarish samaradorligi 45 foizga oshishi kutilmoqda.
“O‘zavtosanoat” keyingi yilda qo‘shimcha xizmatlarni ko‘paytirishni, yagona darcha tizimini yaratishni rejalashtirmoqda.
Turin politexnika universiteti Innovatsion markazining avtobuslarga mobil davlat xizmatlarini ko‘rsatish bo‘yicha faoliyati boshlanganidan so‘ng, avtomobillarni tyuning qilish bo‘yicha juda ko‘p talablar kelib tushdi. Universitet hozirda vazirlik va boshqa davlat tashkilotlari uchun mobil ofislarni yaratish bo‘yicha qiymati 4 milliard so‘m bo‘lgan 40 ta loyihani tugatdi.
Salimovning so‘zlariga ko‘ra, kompaniyada yangi “Qo‘shimcha xizmatlar”, xususan avtomobil tyuningi bilan shug‘ullanadigan yangi yo‘nalish yaratiladi.
“Kelgusidagi rejalar birinchi navbatda mahsulot va ko‘rsatilayotgan xizmatlar sifatini yaxshilash, avtomobil tannarxini tushirish, xaridorlarning ishonchini oqlashdir”, — deydi kompaniya vakili.
Izoh (0)