O‘zbekiston Savdo-sanoat palatasining navbatdan tashqari qurultoyida 2018-yilda amalga oshirilgan ishlar, 2019—2021-yillarga mo‘ljallangan palata strategiyasini belgilab olish hamda nizomiga o‘zgartirish va qo‘shimchalar kiritish masalalari muhokama qilindi, deb yozadi O‘zA.
Savdo-sanoat palatasi raisi A.Ikromov va boshqalar mamlakatda amalga oshirilayotgan islohotlar aholining tadbirkorlik faolligini yanada oshirish, tadbirkorlik faoliyatining barcha bosqichlarida yuzaga kelayotgan muammolarni ortiqcha to‘siqlarsiz hal etishga qaratilgan bozor infratuzilmasi barqaror ishlashini muvofiqlashtiruvchi amaliy mexanizmlarni yaratishda asosiy omil bo‘layotganini ta’kidladi.
Qurultoyda joriy yildagi ishlar tahlil qilinar ekan, unda yana bir muhim masala – amaldagi nizomga tegishli o‘zgartirish kiritish bo‘yicha takliflarga alohida e’tibor qaratildi. Ta’kidlash kerakki, yangi tahrirdagi “O‘zbekiston Respublikasi Savdo-sanoat palatasi to‘g‘risida”gi O‘zbekiston Respublikasi qonunining 17-moddasiga muvofiq, palataga a’zolik kichik biznes va xususiy tadbirkorlik subyektlari uchun ixtiyoriy, boshqa tadbirkorlik subyektlari uchun esa majburiy ekani belgilangan.
Shundan kelib chiqib, Savdo-sanoat palatasi ijro etuvchi qo‘mitasi tomonidan tadbirkorlik subyektlarining talab va takliflarini inobatga olgan holda, a’zolik badallari ta’rifini minimallashtirish taklifi berildi. Unga asosan yirik korxonalarning palataga a’zolik stavkalari 50 foizga, kichik korxonalarning a’zolik stavkalari 20 foizga qisqartirildi.
– O‘tib borayotgan yilda qilingan ishlar samarali bo‘ldi, – dedi Savdo-sanoat palatasi raisi o‘rinbosari J.O‘roqov. – Tadbirkorlikni qo‘llab-quvvatlash, ishbilarmonlik muhitini yaratish borasida ancha ishlar bajarildi. Raqamlarga e’tibor qaratadigan bo‘lsak, 700 dan ortiq huquqiy-me’yoriy hujjatlar ekspertiza qilindi. Palata tomonidan tadbirkorlik faoliyatiga to‘sqinlik qiladigan normalarni olib talash bo‘yicha O‘zbekiston Respublikasi Vazirlar Mahkamasiga va tegishli vazirliklarga takliflar taqdim etildi.
Tadbirda qayd etilganidek, yuqorida zikr etilgan qonun, O‘zbekiston Respublikasi Prezidentining farmoni, qarorlari hamda hukumat qarorlarida belgilangan vazifalar ijrosi bo‘yicha palata tomonidan kelgusida tadbirkorlikni ommalashtirish va rivojlanishini qo‘llab-quvvatlash, biznesning mustahkamligi, ishchanlik muhiti va investitsiyaviy jozibadorligini yanada oshirish, tadbirkorlarning tashqi iqtisodiy faoliyatini, investitsiyalarni jalb qilishni kengaytirish va ularning huquqiy himoyasini ta’minlash hamda o‘quvlar tashkil etishga yanada katta ahamiyat qaratiladi.
Yakunda O‘zbekiston Respublikasi Savdo-sanoat palatasining 2019—2021-yillarga mo‘ljallangan strategiyasi belgilab olindi.
Izoh (0)