Ўзбекистон Савдо-саноат палатасининг навбатдан ташқари қурултойида 2018 йилда амалга оширилган ишлар, 2019—2021 йилларга мўлжалланган палата стратегиясини белгилаб олиш ҳамда низомига ўзгартириш ва қўшимчалар киритиш масалалари муҳокама қилинди, деб ёзади ЎзА.
Савдо-саноат палатаси раиси А.Икромов ва бошқалар мамлакатда амалга оширилаётган ислоҳотлар аҳолининг тадбиркорлик фаоллигини янада ошириш, тадбиркорлик фаолиятининг барча босқичларида юзага келаётган муаммоларни ортиқча тўсиқларсиз ҳал этишга қаратилган бозор инфратузилмаси барқарор ишлашини мувофиқлаштирувчи амалий механизмларни яратишда асосий омил бўлаётганини таъкидлади.
Қурултойда жорий йилдаги ишлар таҳлил қилинар экан, унда яна бир муҳим масала – амалдаги низомга тегишли ўзгартириш киритиш бўйича таклифларга алоҳида эътибор қаратилди. Таъкидлаш керакки, янги таҳрирдаги «Ўзбекистон Республикаси Савдо-саноат палатаси тўғрисида»ги Ўзбекистон Республикаси қонунининг 17-моддасига мувофиқ, палатага аъзолик кичик бизнес ва хусусий тадбиркорлик субъектлари учун ихтиёрий, бошқа тадбиркорлик субъектлари учун эса мажбурий экани белгиланган.
Шундан келиб чиқиб, Савдо-саноат палатаси ижро этувчи қўмитаси томонидан тадбиркорлик субъектларининг талаб ва таклифларини инобатга олган ҳолда, аъзолик бадаллари таърифини минималлаштириш таклифи берилди. Унга асосан йирик корхоналарнинг палатага аъзолик ставкалари 50 фоизга, кичик корхоналарнинг аъзолик ставкалари 20 фоизга қисқартирилди.
– Ўтиб бораётган йилда қилинган ишлар самарали бўлди, – деди Савдо-саноат палатаси раиси ўринбосари Ж.Ўроқов. – Тадбиркорликни қўллаб-қувватлаш, ишбилармонлик муҳитини яратиш борасида анча ишлар бажарилди. Рақамларга эътибор қаратадиган бўлсак, 700 дан ортиқ ҳуқуқий-меъёрий ҳужжатлар экспертиза қилинди. Палата томонидан тадбиркорлик фаолиятига тўсқинлик қиладиган нормаларни олиб талаш бўйича Ўзбекистон Республикаси Вазирлар Маҳкамасига ва тегишли вазирликларга таклифлар тақдим этилди.
Тадбирда қайд этилганидек, юқорида зикр этилган қонун, Ўзбекистон Республикаси Президентининг фармони, қарорлари ҳамда ҳукумат қарорларида белгиланган вазифалар ижроси бўйича палата томонидан келгусида тадбиркорликни оммалаштириш ва ривожланишини қўллаб-қувватлаш, бизнеснинг мустаҳкамлиги, ишчанлик муҳити ва инвестициявий жозибадорлигини янада ошириш, тадбиркорларнинг ташқи иқтисодий фаолиятини, инвестицияларни жалб қилишни кенгайтириш ва уларнинг ҳуқуқий ҳимоясини таъминлаш ҳамда ўқувлар ташкил этишга янада катта аҳамият қаратилади.
Якунда Ўзбекистон Республикаси Савдо-саноат палатасининг 2019—2021 йилларга мўлжалланган стратегияси белгилаб олинди.
Изоҳ (0)