O‘zMU rektori Avazjon Marahimov Rossiya Federatsiyasining Qozon Federal universitetiga tashrif buyurdi, deb yozadi O‘zA. Tashrif davomida hamkorlik aloqalari, professor-o‘qituvchilarning o‘zaro tajriba almashinuvi, yosh o‘qituvchilarning malaka oshirishi borasida qator masalalarni muhokama qilishdi.
O‘zMU rektori tashrif doirasida bugungi kunda Qozon Federal universitetida Meditsina va Iqtisod yo‘nalishida tahsil olayotgan talabalar bilan uchrashdi. O‘zMU rektori talabalarga O‘zbekistonda bo‘layotgan bugungi islohatlar, Prezident tomonidan yaratilayotgan imkoniyatlar haqida gapirdi. Yoshlarni xalq kutayotgani, ular Preziden boshlagan ishni davom ettirishlari kerakligi, yangi investitsiyalar olib kirilishi zarurligi, mamlakat iqtisodini birga ko‘tarishimiz kerakligini bildirdi. Unga javoban yoshlar bu yerda bilim olib, Vatanga qaytib, uning ravnaqi yo‘lida mehnat qilish ishtiyoqida ekanliklarini bildirishdi.
O‘zMU rektori suhbat yakunida o‘qishni tamomlagan har bir yosh O‘zMUga, albatta, kelishini va Milliy universitet ularni ish bilan taminlashini bildirdi. Suhbat davomida QFU rektori Ilshat Gafurov O‘zbekistondan kelgan talabalar xorijiy davlatlar talabalari ichida eng tirishqoq, izlanuvchan, bilimga chanqoq ekanligini takidladi. Ularni o‘z sohalarida yetuk mutaxassis bo‘lishlariga ishonch bildirdi.
Eslatib o‘tamiz: bugungi kunda QFU 7500 nafar xorijiy davlat fuqarolari tahsil oladi. Ulardan 1500 nafari O‘zbekistonlik talabalardir.
Izoh (0)