ЎзМУ ректори Авазжон Мараҳимов Россия Федерациясининг Қозон Федерал университетига ташриф буюрди, деб ёзади ЎзА. Ташриф давомида ҳамкорлик алоқалари, профессор-ўқитувчиларнинг ўзаро тажриба алмашинуви, ёш ўқитувчиларнинг малака ошириши борасида қатор масалаларни муҳокама қилишди.
ЎзМУ ректори ташриф доирасида бугунги кунда Қозон Федерал университетида Медицина ва Иқтисод йўналишида таҳсил олаётган талабалар билан учрашди. ЎзМУ ректори талабаларга Ўзбекистонда бўлаётган бугунги ислоҳатлар, Президент томонидан яратилаётган имкониятлар ҳақида гапирди. Ёшларни халқ кутаётгани, улар Президен бошлаган ишни давом эттиришлари кераклиги, янги инвестициялар олиб кирилиши зарурлиги, мамлакат иқтисодини бирга кўтаришимиз кераклигини билдирди. Унга жавобан ёшлар бу ерда билим олиб, Ватанга қайтиб, унинг равнақи йўлида меҳнат қилиш иштиёқида эканликларини билдиришди.
ЎзМУ ректори суҳбат якунида ўқишни тамомлаган ҳар бир ёш ЎзМУга, албатта, келишини ва Миллий университет уларни иш билан таминлашини билдирди. Суҳбат давомида ҚФУ ректори Илшат Гафуров Ўзбекистондан келган талабалар хорижий давлатлар талабалари ичида энг тиришқоқ, изланувчан, билимга чанқоқ эканлигини такидлади. Уларни ўз соҳаларида етук мутахассис бўлишларига ишонч билдирди.
Эслатиб ўтамиз: бугунги кунда ҚФУ 7500 нафар хорижий давлат фуқаролари таҳсил олади. Улардан 1500 нафари Ўзбекистонлик талабалардир.
Изоҳ (0)