Joriy yilning 15-dekabr holatiga 679,14 milliard so‘mlik 28 ta investitsiya loyihasi foydalanishga topshirilib, ularning 7 tasi EIZlarda faoliyat ko‘rsatmoqda. 2018-yil yakuniga qadar qo‘shimcha 134,47 milliard so‘mlik 9 loyiha ishga tushirilishi ko‘zda tutilgan. Bu haqda O‘zA xabarida aytiladi.
Mamlakatda farmatsevtika sohasida iqtisodiy islohotlarni yanada chuqurlashtirish, yangi ishlab chiqarish quvvatlarini ishga tushirish va mavjudlarini modernizatsiya qilish, chet el investitsiyalarini jalb qilish uchun qulay sharoitlar yaratish, jahon bozorida raqobatbardosh tayyor mahsulotlar ishlab chiqarish hajmi va turini kengaytirishga qaratilgan keng ko‘lamli ishlar amalga oshirilayotir.
Aholi va sog‘liqni saqlash muassasalarini arzon dori vositalari, tibbiyot buyumlari bilan ta’minlashni yaxshilashga qaratilgan qator ishlar amalga oshirilmoqda. Xususan, Prezidentning 2017-yil 7-noyabrdagi “Farmatsevtika tarmog‘ini boshqarish tizimini tubdan takomillashtirish chora-tadbirlari to‘g‘risida”gi farmoniga muvofiq farmatsevtika tarmog‘ini rivojlantirish agentligi tashkil etildi.
Respublikada 7 ta farmatsevtika erkin iqtisodiy zonalar faoliyati yo‘lga qo‘yildi, zonalarga xorijiy va mahalliy investorlarning jalb etilgan holda loyihalarni amalga oshirish boshlandi.
Joriy yilning 15-dekabr holatiga 679,14 milliard so‘mlik 28 ta investitsiya loyihasi foydalanishga topshirilib, ularning 7 tasi EIZlarda faoliyat ko‘rsatmoqda. 2018-yil yakuniga qadar qo‘shimcha 134,47 milliard so‘mlik 9 loyiha ishga tushirilishi ko‘zda tutilgan.
Hozirda sohada jami 153 ta korxona faoliyat yuritmoqda, shuningdek, 8 ta korxona litsenziya olish jarayonida. Joriy yilda ishlab chiqarish sur’atining o‘sishi o‘tgan yilga nisbatan 125 foizni tashkil etib, mahalliy dori vositalari narxlarining o‘rtacha 10 foizga pasayishiga erishildi.
2018-yilning o‘tgan 11 oyi davomida farmatsevtika mahsulotlari eksport hajmi 18,6 million AQSh dollarini tashkil etib, o‘tgan yilning shu davriga nisbatan 109,5 foizga o‘sdi.
Jumladan, Respublikada jami 2 ming 229 ta ijtimoiy dorixona tashkil etildi. Ijtimoiy ahamiyatga ega 113 turdagi dori vositalari va 7 turdagi tibbiyot buyumlari ro‘yxati tasdiqlandi. Mazkur dori vositalari va tibbiyot buyumlarini sotish ularning sotib olish qiymati yoki ulgurji narxiga 10 foiz cheklangan savdo ustamasi qo‘llanilgan holda amalga oshirilishi yo‘lga qo‘yildi.
Dori vositalari va tibbiyot buyumlarini davlat ro‘yxatidan o‘tkazish tizimini takomillashtirish bo‘yicha yuqori tartibga soluvchi talablar qo‘yilgan mamlakatlarda ro‘yxatdan o‘tkazilgan dori vositalarini ro‘yxatdan o‘tkazish natijalarini tan olish tartibi yo‘lga qo‘yildi.
20 ta yetakchi xorijiy davlatda ro‘yxatdan o‘tkazilgan dori vositalari respublikada qo‘shimcha tekshiruvlarsiz olinishi yo‘lga qo‘yildi. Ro‘yxatdan o‘tkazish muddati 250 dan 155 kalendar kuniga, talab etiladigan hujjatlar soni 78 tadan 66 taga, undiriladigan yig‘im miqdori esa 5 ming AQSh dollaridan 3 ming 595 AQSh dollariga qisqartirildi.
“Yaxshi ishlab chiqarish amaliyoti – GMP” davlat standarti xalqaro standartlar bilan muvofiqlashtirilgan. O‘zbekiston Respublikasiga Yevropa dori vositalari direktorati kuzatuvchisi maqomi berildi.
Substansiyalarni bir martalik olib kirish amaliyotiga chek qo‘yilib, ularni ro‘yxatdan o‘tkazish tizimi joriy etildi. Natijada joriy yil boshidan 316 turdagi xorijiy xomashyo (substansiya) davlat ruyxatidan o‘tkazildi hamda ishlab chiqarilishi yo‘lga qo‘yildi.
Innovatsion rivojlanish vazirligi bilan hamkorlikda farmatsevtika sohasida yangi texnologiyalar va mahsulotlarni yaratish dasturi loyihasi ishlab chiqildi. Davlat sog‘liqni saqlash muassasalarida foydalanilayotgan tibbiyot uskunalari inventarizatsiyadan o‘tkazilib, mavjud 136 mingdan ortiq tibbiy texnikadan 3,8 mingtasi ta’mirtalab va 3,7 mingtasi foydalanishga yaroqsiz holatda ekanligi aniqlandi.
Tibbiyot uskunalaridan foydalanish sohasida aniqlangan muammolarni bartaraf etish yuzasidan chora-tadbirlar ishlab chiqilgan. Bu kabi sa’y-harakatlar aholiga tibbiy xizmat ko‘rsatish, ularni sifatli dori-darmon bilan ta’minlash imkoniyatini kengaytiradi.
Izoh (0)