Андижон вилояти ИИБ ҳузуридаги Тергов бошқармаси томонидан фуқароларнинг келгусида фирибгарликнинг қурбонига айланиб қолишлари олдини олиш борасида мунтазам тушунтириш-тарғибот ишлари ўтказилмоқда. Бу ҳақда «Дарё» мухбири Миролим Исажонов хабар бермоқда.
Деярли ҳар биримиз кундалик ҳаётимизда фирибгарларнинг ширин сўзлари ва катта ваъдаларига учиб, улар тузоғига илинган инсонлар билан тез-тез мулоқотда бўламиз ёҳуд дард-у ҳасратини тинглаймиз. Охирги пайтларда яқин қариндошлар, дўст-у биродарларнинг бир-бирини чув туширишаётганидан ҳайратланмай ҳам қўйдик. Аммо бундай ҳатти-ҳаракатлар натижасида турли жиноятларнинг келиб чиқаётгани, айниқса, дахшатли воқеаларнинг рўй бераётгани жуда ҳам ачинарлидир.
Бутун дунё мамлакатларининг оғриқли муаммосига айланган фирибгарлик жиноятини олдини олиш мақсадида Андижон вилояти ИИБ ҳузуридаги Тергов бошқармаси ходимлари томонидан ҳам аҳоли орасида кенг миқёсда тушунтириш-тарғибот ишлари олиб борилмоқда.
Жорий йил вилоятда умумий жиноятчилик сезиларли даражада камайган бўлса-да, аммо фирибгарлик жиноятлари салмоғи пасайиши қийин кечаётир. Ўтган ўн бир ой давомида 578 та фирибгарлик ишига нисбатан тергов жараёнлари ўтказилган бўлса, шундан 124 таси хотин-қизлар томонидан содир этилган.
Бошқарманинг туман ва шаҳар бўлими ходимлари деярли ҳар куни сектор ишчи гуруҳлари, ҳудудий Ички ишлар органларининг таянч пунктлари, маҳаллий ҳокимият, аҳоли гавжум масканлар – бозорлар, таълим ва тиббиёт муассасалари, корхона- ташкилотлар, кўча-кўйларда Ўзбекистон Республикаси ИИВ ҳузуридаги Тергов департаменти ташаббусига биноан ишлаб чиқилган буклетларни тарқатиб, юртдошларимиз билан суҳбат ўтказмоқдалар. Бу эса қайсидир маънода фуқароларнинг ҳуқуқий онгини ўсиши ҳамда келгусида фирибгарликнинг қурбонига айланиб қолишларига қарши курашишда хизмат қилаётир.
Изоҳ (0)