Faol tadbirkorlik, innovatsion g‘oyalar va texnologiyalarni qo‘llab-quvvatlash yili yakunlanib bormoqda. Mazkur yil Turizmni rivojlantirish davlat qo‘mitasi faoliyatida qanday yangiliklar olib keldi? Yilning ahamiyati nimalarda aks etdi? — degan savollar ko‘tariladi O‘zA xabarida.
Turizm sohasi mamlakat iqtisodiyotining strategik tarmog‘i sifatida belgilangan va bugungi kundagi, shu jumladan “Faol tadbirkorlik, innovatsion g‘oyalar va texnologiyalarni qo‘llab-quvvatlash yili” Davlat dasturi doirasidagi vazifalar ham shu maqsadni amalga oshirishga qaratilgan.
Ta’kidlash lozimki, joriy yil mamlakatda turizmni rivojlantirish uchun ahamiyatli yil bo‘ldi. Misol uchun, kirish va ichki turizmni rivojlantirishga qaratilgan 150 ga yaqin chora-tadbirlar belgilandi. Xususan, sayyohlar uchun viza rejimi tubdan o‘zgardi. Ya’ni qo‘shimcha tarzda 9 mamlakat uchun vizasiz rejim tatbiq etildi. Hozirda bunday mamlakatlar soni 18 yetdi.
Natijada qulaylik yaratilgan 9 mamlakatdan tashrif buyuruvchilar soni joriy yilning 11 oyida o‘tgan yilning shu davriga nisbatan o‘rtacha 4 barobarga o‘sdi. Misol uchun, Isroildan kelayotganlar soni deyarli 3 barobar, Singapurdan 2 barobardan oshiqroq, Indoneziya va Malayziyadan deyarli 2 barobar, qo‘shni Tojikistondan esa 5 barobargacha o‘sish kuzatildi.
Shuningdek, xorijiy fuqarolarni elchixonalarga bevosita borishlari, navbatda turish kabi noqulayliklarini bartaraf etish maqsadida 15-iyuldan elektron kirish vizalarini berish tizimi yo‘lga qo‘yildi. Mazkur tizim ishga tushgandan bugungi kunga qadar 50 mamlakatdan 22 mingdan ortiq fuqaroga elektron vizalar berildi.
Elektron vizalarni olishda XXR yetakchilik qilmoqda. Xususan, XXR fuqarolari jami 6,9 mingdan ortiq elektron vizalar olishgan. Hindiston, AQSh, Buyuk Britaniya, Italiya, Germaniya, Fransiya fuqarolari ham bu borada faol.
Mamlakatga tashrif buyurgan sayyohlarni ro‘yxatga olish tizimini takomillashtirish va soddalashtirish maqsadida xorijiy fuqarolarni ro‘yxatdan o‘tkazish tartibi butunlay elektron shaklga o‘tkazildi.
Mazkur ma’lumotlar Turizmni rivojlantirish davlat qo‘mitasining Faol tadbirkorlik, innovatsion g‘oyalar va texnologiyalarni qo‘llab-quvvatlash yili doirasida amalga oshirilgan ishlarga bag‘ishlangan yig‘ilishda ma’lum qilindi.
Izoh (0)