Ўзбекистонга Исроилдан келаётган сайёҳлар сони 3 баробар, Сингапурдан эса 2 баробарга ошди

Фаол тадбиркорлик, инновацион ғоялар ва технологияларни қўллаб-қувватлаш йили якунланиб бормоқда. Мазкур йил Туризмни ривожлантириш давлат қўмитаси фаолиятида қандай янгиликлар олиб келди? Йилнинг аҳамияти нималарда акс этди? — деган саволлар кўтарилади ЎзА хабарида.

Туризм соҳаси мамлакат иқтисодиётининг стратегик тармоғи сифатида белгиланган ва бугунги кундаги, шу жумладан «Фаол тадбиркорлик, инновацион ғоялар ва технологияларни қўллаб-қувватлаш йили» Давлат дастури доирасидаги вазифалар ҳам шу мақсадни амалга оширишга қаратилган.

Таъкидлаш лозимки, жорий йил мамлакатда туризмни ривожлантириш учун аҳамиятли йил бўлди. Мисол учун, кириш ва ички туризмни ривожлантиришга қаратилган 150 га яқин чора-тадбирлар белгиланди. Хусусан, сайёҳлар учун виза режими тубдан ўзгарди. Яъни қўшимча тарзда 9 мамлакат учун визасиз режим татбиқ этилди. Ҳозирда бундай мамлакатлар сони 18 етди.

Натижада қулайлик яратилган 9 мамлакатдан ташриф буюрувчилар сони жорий йилнинг 11 ойида ўтган йилнинг шу даврига нисбатан ўртача 4 баробарга ўсди. Мисол учун, Исроилдан келаётганлар сони деярли 3 баробар, Сингапурдан 2 баробардан ошиқроқ, Индонезия ва Малайзиядан деярли 2 баробар, қўшни Тожикистондан эса 5 баробаргача ўсиш кузатилди.

Шунингдек, хорижий фуқароларни элчихоналарга бевосита боришлари, навбатда туриш каби ноқулайликларини бартараф этиш мақсадида 15 июлдан электрон кириш визаларини бериш тизими йўлга қўйилди. Мазкур тизим ишга тушгандан бугунги кунга қадар 50 мамлакатдан 22 мингдан ортиқ фуқарога электрон визалар берилди.

Электрон визаларни олишда ХХР етакчилик қилмоқда. Хусусан, ХХР фуқаролари жами 6,9 мингдан ортиқ электрон визалар олишган. Ҳиндистон, АҚШ, Буюк Британия, Италия, Германия, Франция фуқаролари ҳам бу борада фаол.

Мамлакатга ташриф буюрган сайёҳларни рўйхатга олиш тизимини такомиллаштириш ва соддалаштириш мақсадида хорижий фуқароларни рўйхатдан ўтказиш тартиби бутунлай электрон шаклга ўтказилди.

Мазкур маълумотлар Туризмни ривожлантириш давлат қўмитасининг Фаол тадбиркорлик, инновацион ғоялар ва технологияларни қўллаб-қувватлаш йили доирасида амалга оширилган ишларга бағишланган йиғилишда маълум қилинди.