Ўзбекистонда электр энергия ишлаб чиқариш қувватларини ошириш баробарида мавжуд ресурслардан тежамли ва самарали фойдаланишга алоҳида эътибор қаратилмоқда. Бу ҳақда «Тараққиёт стратегияси» марказида ташкил этилган «2018 йилда истеъмолчиларни узлуксиз электр энергияси билан таъминлаш борасидаги фаолият: эришилган натижалар ва истиқболдаги устувор возифалар» мавзусида ўтказилган матбуот анжуманида тўхталиб ўтилди.
«Электр энергия ишлаб чиқаришни қанчалик оширмайлик, агар унинг сарфини тартибга солмас эканмиз, йилдан йилга ортиб бораётган талабни қондириш жуда мушкул», – дейди «Ўзбекэнерго» акционерлик жамияти бошқаруви раиси Улуғбек Мустафоев.
«Мисол учун, бугун аҳоли фаровонлиги ошаётганлиги сабабли ҳар бир хонадонда камида битта телевизор, кир ювиш машинаси, чангютгич, кондиционер каби маиший техникалар бор. Баъзида улардан фойдаланиб бўлгач, токдан узиб қўйилмайди. Гарчи, улар ўчирилган бўлса-да, ток линиясига уланган ҳолда тураверса, электр энергия истеъмол қилаверади. Биргина оддий телефон қувватлагичини олайлик. У токка уланган ҳолда куну тун қолса, ўртача бир ойда 1,5 киловатт/соат, йилига 18 киловатт/соат энергия сарфлайди. Шу боис мамлакатимизда ҳам хонадонларда, ишлаб чиқариш саноатида ва бошқа турли тармоқларда электр энергия тежамкорлигини таъминлаш устувор вазифа бўлиб қолмоқда», — деди Мустафоев.
Мутахассисларнинг ўрганишларига, ҳозирда Ўзбекистондаги ҳар бир хонадонда бир йилда ўртача 400 киловатт/соатгача электр энергиясини тежаш имконияти бор. Бу кўрсаткич республика бўйича 1,8 миллиард киловатт/соатга айланади.
«Таққослайдиган бўлсак, ушбу тежалган энергия билан аҳолиси ўртача бўлган бир вилоятни бир йил мобайнида узлуксиз электр энергия билан таъминлаш мумкин. Демак, ҳар бир инсон ўз хонадонида электрнинг беҳуда исрофгарчилигига чек қўйиш йўли билан чироқ етиб бормаётган қанча-қанча хонадонларга ёруғлик улашиш имкони мавжуд экан. Бу ҳам савобли, ҳам фойдали ишдир», — дейилади «Ўзбекэнерго» матбуот хизмати ахборотида.
«Электр энергияни тежаш орқали экологик барқарорликка ҳам муносиб улуш қўшиш мумкин. Мисол учун, 1 киловатт/соат электр ишлаб чиқариш жараёнида атмосферага 0,6 килограмм кўмир чиқиндиси, 0,12 метр куб ис гази чиқади. Демак, ҳар бир истеъмолчи хонадонида электр энергиядан оқилона фойдаланса, ҳам табиий неъматларни тежашга, ҳам атроф-муҳит мусаффолигига ўз улушини қўшган бўлади. Шунингдек, истеъмолчини ортиқча маблағ сарфлашдан ҳам асрайди. Иқтисод қилинган маблағ жамғариб борилса, рўзғорнинг қанча кам-кўстини тўлдириш мумкин», — дейди «Ўзбекэнерго» раҳбари Улуғбек Мустафоев.
Изоҳ (0)