Prezidentning O‘zbekiston Respublikasi va Koreya Respublikasi o‘rtasida kelgusida ikki tomonlama hamkorlikni mustahkamlash va kengaytirish chora-tadbirlari to‘g‘risidagi qarori ijrosi doirasida 2018-yilning 18-dekabr kuni “Olmaliq KMK” aksiyadorlik jamiyatida nodir metallar va qotishmalar O‘zbek-Koreys Ilmiy-texnologik markazini tashkil etish bo‘yicha bitim imzolandi. Bu haqda O‘zA xabar bermoqda.
“Olmaliq KMK” AJdagi davlat ulushi ishonchli boshqaruv SFI Management Group kompaniyasiga berilgach, kombinatning ishlab chiqarish quvvati modernizatsiyalash va innovatsion taraqqiyot sari yuz burdi.
O‘zbek – Koreys markazida nodir metallar va qotishmalarning yangi turlarini ishlab chiqarish rejalashtirilgan. Markaz ilg‘or faoliyat sohalarida beshta laboratoriyani o‘z ichiga oladi. Bugungi kunda o‘ta dolzarb bo‘lib kelayotgan metallurgiyadagi yo‘nalish, ya’ni sof tarkibli qiyin eriydigan metallar, xususan, volfram va molibden, ulardan nanotexnologiya hamda ilg‘or kimyo-metallurgiya texnologiyalari yordamida qotishmalar olishdir. Shu o‘rinda yana bir muhim jihat, Janubiy Koreyaning eng yaxshi korxonalari va ilmiy laboratoriyalarida Olmaliq kon-metallurgiya kombinatining yosh ilmiy va muhandis kadrlarini tayyorlash imkoniyatidir.
Imzolangan kelishuv asnosida metallurgiya sohasida hamkorlikda ilmiy-tadqiqot va tajriba-konstruktorlik loyihalarini joriy etishga, mineral xom-ashyolarni boyitishga, yangi qotishma va materiallar yaratishga, pirovardida raqobatbardosh mahsulotlarni ishlab chiqarishga erishiladi.
Ikki mamlakatning Ilmiy-texnologik markazini tashkil etilishi keng ko‘lamli o‘zgarishlarning amalga oshayotgani va mamlakat iqtisodiyotini modernizatsiya qilishning yorqin ifodasidir.
Izoh (0)