Президентнинг Ўзбекистон Республикаси ва Корея Республикаси ўртасида келгусида икки томонлама ҳамкорликни мустаҳкамлаш ва кенгайтириш чора-тадбирлари тўғрисидаги қарори ижроси доирасида 2018 йилнинг 18 декабрь куни «Олмалиқ КМК» акциядорлик жамиятида нодир металлар ва қотишмалар Ўзбек-Корейс Илмий-технологик марказини ташкил этиш бўйича битим имзоланди. Бу ҳақда ЎзА хабар бермоқда.
«Олмалиқ КМК» АЖдаги давлат улуши ишончли бошқарув SFI Management Group компаниясига берилгач, комбинатнинг ишлаб чиқариш қуввати модернизациялаш ва инновацион тараққиёт сари юз бурди.
Ўзбек – Корейс марказида нодир металлар ва қотишмаларнинг янги турларини ишлаб чиқариш режалаштирилган. Марказ илғор фаолият соҳаларида бешта лабораторияни ўз ичига олади. Бугунги кунда ўта долзарб бўлиб келаётган металлургиядаги йўналиш, яъни соф таркибли қийин эрийдиган металлар, хусусан, волфрам ва молибден, улардан нанотехнология ҳамда илғор кимё-металлургия технологиялари ёрдамида қотишмалар олишдир. Шу ўринда яна бир муҳим жиҳат, Жанубий Кореянинг энг яхши корхоналари ва илмий лабораторияларида Олмалиқ кон-металлургия комбинатининг ёш илмий ва муҳандис кадрларини тайёрлаш имкониятидир.
Имзоланган келишув асносида металлургия соҳасида ҳамкорликда илмий-тадқиқот ва тажриба-конструкторлик лойиҳаларини жорий этишга, минерал хом-ашёларни бойитишга, янги қотишма ва материаллар яратишга, пировардида рақобатбардош маҳсулотларни ишлаб чиқаришга эришилади.
Икки мамлакатнинг Илмий-технологик марказини ташкил этилиши кенг кўламли ўзгаришларнинг амалга ошаётгани ва мамлакат иқтисодиётини модернизация қилишнинг ёрқин ифодасидир.
Изоҳ (0)