18-dekabrning asosiy yangiliklari — “Daryo” dayjestida.
Ijtimoiy tarmoqlarda Toshkent metrosining “Alisher Navoiy” bekatida bir qizning relsga tushib ketishi aks etgan video tarqaldi. Toshkent shahar IIBB rasmiy axborotiga ko‘ra, ushbu hodisa joriy yilning 29-iyulida yuz bergan. 20 yoshli Gulbahor B. hushini yo‘qotib, yaqinlashib kelayotgan metro elektropoyezdi relsiga tushib ketgan. Mashinist shoshilinch tormoz berishni qo‘llagan, natijada fojianing oldi olingan. Jabrlanuvchi arzimas shikastlanishlar bilan qutulib qoldi.
***
Toshkentdagi Zarqaynar majmuasi auksion savdolariga qo‘yildi. 2005-yilda qurilgan ushbu bino bir paytlar O‘zbekistonning Birinchi Prezidenti Islom Karimovning to‘ng‘ich qizi Gulnora Karimovaga tegishli edi. Ushbu majmua hozirgi kunda “O‘zbekneftgaz” milliy xolding kompaniyasi tomonidan tasarruf etiladi. Lotning boshlang‘ich narxi 87,9 milliard so‘mni tashkil etdi. Zakalat miqdori - 4,3 milliard so‘m. Arizalar 23-yanvarga qadar qabul qilinadi. Auksion esa 25-yanvar kuni bo‘lib o‘tadi.
***
O‘zbekistonda bu yil talabalar qaysi sanadan qishki ta’tilga chiqishi ma’lum qilindi. Talabalar odatdagidek 28-dekabrdan qishki ta’tilga ketadi va u 10-yanvarga qadar davom etadi. 27-dekabr oxirgi o‘qish kuni, 11-yanvar kuni esa ta’lim muassasalarida darslar boshlanadi.
***
Vladimir Putinning vakolati oshirildi. Davlat dumasi soddalashtirilgan sxema asosida prezident tomonidan Rossiya fuqaroligiga nomzodlarni tanlash huquqini beruvchi qonun loyihasini uchinchi, yakuniy o‘qishda qabul qildi. Vladimir Putin Rossiya fuqaroligini berishni liberallashtirish haqida iyun oyida e’lon qilgandi. Uning so‘zlariga ko‘ra, ushbu jarayonni soddalashtirish turli muammolarni, birinchi navbatda demografik muammoni hal etishda yordam beradi.
***
Qur’oni karimning 900 yillik nusxasi topildi. Eron Islom Respublikasining Tehron shahridagi muzeyda Qur’oni karimning XII asrga tegishli nusxasi namoyish etildi. Ushbu nusxa 1150-yilga tegishli bo‘lib, xattot Abul Fahr ibn Abilfazl al-Zafaroniy tomonidan ko‘chirilgan va unga Zafaroniy nusxasi deb nom berilgan.
Izoh (0)