O‘zbekistonda haydovchining mast ekanligi alkotester yordamida aniqlanadi

Transport vositalari haydovchilarining mast holatda ekanligini aniqlash tartibi to‘g‘risidagi nizom Adliya vazirligida davlat ro‘yxatidan o‘tkazildi. Bu haqda “Huquqiy axborot” kanali ma’lum qildi.

Nizomga muvofiq, haydovchilarning alkogolli ichimliklar ta’siridan mast holatda ekanligini aniqlash ichki ishlar organining Davlat yo‘l harakati xavfsizligi xizmati (DYHXX) xodimlari tomonidan amalga oshiriladi.

Haydovchilarning mast holatda ekanligini aniqlash bo‘yicha tekshiruv alkotester (havoga chiqarilgan etanol bug‘larini aniqlovchi va tekshiruv natijalarini qog‘ozda aks ettiruvchi maxsus texnik vosita) yordamida amalga oshiriladi.

Quyidagilar haydovchilarning alkogolli ichimliklar, giyohvandlik vositalari ta’siridan yoki o‘zgacha tarzda mast holda ekanligini aniqlash uchun tekshiruv o‘tkazishga asos bo‘ladi:

Haydovchining og‘iz bo‘shlig‘idan alkogol hidi kelishi;

Bir holatda to‘g‘ri tura olmasligi (chayqalib turishi);

Nutqining buzilganligi;

Qo‘l barmoqlarining qaltirashi;

Yuz terisi rangining sezilarli o‘zgarganligi.