Oliy Majlis Senatining XVII yalpi majlisida senatorlar tomonidan “Urug‘chilik to‘g‘risida”gi O‘zbekiston Respublikasi qonuni ko‘rib chiqildi, deb xabar berdi “Daryo” muxbiri Sevara Nishonova.
Mazkur qonun urug‘chilik sohasidagi munosabatlarni tartibga solish mexanizmlarini takomillashtirishga qaratilgan.
Urug‘likni eksport qilish uchun qulay shart-sharoitlar yaratish, urug‘chilik sohasida subyektlarning huquq va majburiyatlarini belgilash ham qonunni ishlab chiqishdan ko‘zlagan maqsadlardan.
Qonunda investitsiyalarni jalb etish uchun qulay shart-sharoitlar yaratish ko‘zda tutilgan. Infratuzilma va servis xizmatlarini rivojlantirish, ilmiy-tadqiqot ishlarini rivojlantirish va faoliyatning zamonaviy shakllarini joriy etishga e’tibor qaratilgan.
Urug‘liklarni ko‘paytirishning va ular bilan iste’molchilarni ta’minlashning samarali tizimini yaratishni nazarda tutadigan urug‘chilik sohasidagi davlat siyosatining asosiy yo‘nalishlari belgilanmoqda.
Urug‘liklarni ishlab chiqarish, tayyorlash, ularga ishlov berish, ularni saqlash, ishlatish va realizatsiya qilish masalalari tartibga solinmoqda. Urug‘lik yetishtiruvchilarning reyestrini yuritish tartibi ham belgilanmoqda.
Senatorlarning fikricha, qonun urug‘chilik sohasidagi munosabatlarni tartibga solish mexanizmini yanada takomillashtiradi. Urug‘liklarni eksport qilish, urug‘liklar toifalarini xalqaro toifalarga muvofiq belgilash uchun qulay shart-sharoitlar yaratadi.
Urug‘chilik sohasidagi subyektlarning huquqlari va majburiyatlarini belgilashga, urug‘liklar sifatini yaxshilashga xizmat qiladi.
Qonun senatorlar tomonidan ma’qullandi.
Izoh (0)