Prezident Shavkat Mirziyoyev “Yoshlarni vatanparvarlik ruhida va jismoniy tarbiyalash hamda chaqiriluvchilarni harbiy-texnik mutaxassisliklar bo‘yicha tayyorlash tartibini takomillashtirish bo‘yicha qo‘shimcha chora-tadbirlar to‘g‘risida”gi qarorni imzoladi.
Hujjatga ko‘ra, mudofaaga ko‘maklashuvchi “Vatanparvar” tashkiloti Markaziy kengashi tomonidan ta’lim muassasalari va avtodromlarni ularning asosiy vositalari, o‘quv va moddiy-texnik bazasi bilan birgalikda mulk qilib davlatga beg‘araz berish to‘g‘risida qaror qabul qilingan. Mudofaa vazirligiga ularni operativ boshqarish huquqi asosida qabul qilib olish topshirildi.
Mudofaa vazirligining Qoraqalpog‘iston Respublikasi, viloyatlar va Toshkent shahar mudofaa ishlari boshqarmalari Chaqiriluvchilarni harbiy-texnik mutaxassisliklar bo‘yicha tayyorlash markazlarini tashkil etish to‘g‘risidagi taklifiga rozilik berildi.
Markazga O‘zbekiston Respublikasi mudofaa vaziri tomonidan lavozimga tayinlanadigan va lavozimdan ozod qilinadigan direktor rahbarlik qiladi;
Markaz direktori maqomi va mehnatga haq to‘lash (pul ta’minoti) sharoitlariga ko‘ra mudofaa ishlari boshqarmasi boshlig‘ining o‘rinbosariga tenglashtiriladi;
Markaz fuqaro xodimlarining ish haqi mudofaa ishlari boshqarmalarining fuqaro xodimlari uchun belgilangan tartib va me’yorlarda to‘lanadi;
Markazlarning faoliyati davlat byudjeti mablag‘lari va qonun hujjatlari bilan taqiqlanmagan boshqa manbalar hisobidan moliyalashtiriladi;
Mudofaa ishlari boshqarmalari Markazlarda tayyorgarlikdan, qayta tayyorgarlikdan o‘tgan va malakasini oshirgan avtomototransport vositalari haydovchilarining, shuningdek, ommaviy texnik kasblarning boshqa mutaxassislarining hisobini yuritadi;
Markazlar faoliyati tashkil etilgunga qadar chaqiriluvchilarni harbiy-texnik mutaxassisliklar bo‘yicha tayyorlash amaldagi tartibga muvofiq amalga oshiriladi.
Qaror bilan Yoshlarni harbiy-vatanparvarlik ruhida tarbiyalash sohasidagi faoliyatni takomillashtirish bo‘yicha “Yo‘l xaritasi” va 2019—2021-yillarda O‘zbekiston Respublikasida sportning texnik va amaliy turlarini yanada rivojlantirish va ommalashtirish bo‘yicha chora-tadbirlar dasturi tasdiqlandi.
2019/2020-o‘quv yilidan boshlab O‘zbekiston davlat jismoniy tarbiya va sport universitetiga umumiy qabul kvotalari doirasida sportning texnik va amaliy turlari bo‘yicha mutaxassislar tayyorlash uchun kvotalar ko‘zda tutiladi.
Izoh (0)