22—26-noyabr kunlari besh kun mobaynida Qozog‘iston, Qirg‘iziston, Tojikiston va O‘zbekiston davlatlari hududida bir vaqtning o‘zida “Stop trafik” tezkor profilaktik tadbirlari o‘tkazildi. Bu haqda IIV Jamoatchilik va ommaviy axborot vositalari bilan aloqalar boshqarmasi xabar berdi.
Tadbir 2014—2018-yillarda jinoyatchilikka qarshi kurashish to‘g‘risidagi Davlatlararo hamkorlikdagi choralar dasturi ijrosini ta’minlash hamda 2018-yilning 6-oktabrida Qirg‘iziston Respublikasining Cho‘lpon ota shahrida bo‘lib o‘tgan ushbu davlatlar Ichki ishlar vazirlari tomonidan erishilgan kelishuvga asosan o‘tkazildi.Tadbirning asosiy maqsadi Odam savdosi bilan bog‘liq transchegaraviy va transmilliy guruhlar jinoiy faoliyatini oldini olish va ularni fosh etish, odam savdosi jinoyati bo‘yicha qidiruvda bo‘lgan shaxslarni aniqlash va ushlashdan iborat.Tadbir davomida O‘zbekiston hududida 24 ta jinoyat aniqlangan bo‘lsa, shundan uchtasi jinsiy ekspluatatsiya bilan bog‘liq odam savdosi jinoyati, bittasi voyaga yetmaganni sotish, 20 tasi fohishaxona saqlash va qo‘shmachilik jinoyatlaridir.
Bunda 199 nafar ayol fohishalik bilan shug‘ullanganligi aniqlanib, hisobga qo‘yildi. 73 ta ma’muriy huquqbuzarlik holati aniqlandi, ya’ni 45 ta holatda fohishalik bilan shug‘ullanish, to‘qqiz holatda videomahsulotlar va ularni tayyorlash, 19 ta pornografik mahsulotlar bilan bog‘liq noqonuniy holatlardir. Shundan 1205 ta pornografik materiallar belgilangan tartibda olindi.To‘rtta davlatda o‘tkazilayotgan tadbirlarni umumlashtirish uchun Qozog‘iston Respublikasi Ichki ishlar vazirligida har bir davlatning vakillari ishtirokida muvofiqlashtirish shtabi tuzildi.Qozog‘iston Respublikasida o‘tkazilgan tadbir davomida O‘zbekiston Respublikasi tomonidan odam savdosi jinoyati uchun qidiruvda bo‘lgan O‘zbekiston fuqarosi aniqlanib, qo‘lga olindi. Qozog‘istondan O‘zbekistonga qaytish imkoni bo‘lmagan 10 nafar fuqarolar aniqlanib, ularni qaytarish choralari ko‘rildi.Ostona shahri Abay ko‘chasidagi uylardan birida o‘tkazilgan tadbir natijasida 8 nafar qizlar fohishalik bilan shug‘ullanayotganliklari, ulardan 4 nafar qiz O‘zbekistondan borganliklari aniqlandi.O‘zbekiston Respublikasi Ichki ishlar vazirligi vakili Ostona shahridagi “Komek” va Olmaota shahridagi “Rodnik” ijtimoiy himoya qilish muassasalarida bo‘lib, odam savdosidan jabrlangan 11 nafar o‘zbekistonlik bilan suhbatlashib, ularni tergov ishlari yakunlanishi bilan O‘zbekistonga qaytarish choralari kelishib olindi.
Izoh (0)