22—26 ноябрь кунлари беш кун мобайнида Қозоғистон, Қирғизистон, Тожикистон ва Ўзбекистон давлатлари ҳудудида бир вақтнинг ўзида «Стоп трафик» тезкор профилактик тадбирлари ўтказилди. Бу ҳақда ИИВ Жамоатчилик ва оммавий ахборот воситалари билан алоқалар бошқармаси хабар берди.
Тадбир 2014—2018 йилларда жиноятчиликка қарши курашиш тўғрисидаги Давлатлараро ҳамкорликдаги чоралар дастури ижросини таъминлаш ҳамда 2018 йилнинг 6 октябрида Қирғизистон Республикасининг Чўлпон ота шаҳрида бўлиб ўтган ушбу давлатлар Ички ишлар вазирлари томонидан эришилган келишувга асосан ўтказилди.Тадбирнинг асосий мақсади Одам савдоси билан боғлиқ трансчегаравий ва трансмиллий гуруҳлар жиноий фаолиятини олдини олиш ва уларни фош этиш, одам савдоси жинояти бўйича қидирувда бўлган шахсларни аниқлаш ва ушлашдан иборат.Тадбир давомида Ўзбекистон ҳудудида 24 та жиноят аниқланган бўлса, шундан учтаси жинсий эксплуатация билан боғлиқ одам савдоси жинояти, биттаси вояга етмаганни сотиш, 20 таси фоҳишахона сақлаш ва қўшмачилик жиноятларидир.
Бунда 199 нафар аёл фоҳишалик билан шуғулланганлиги аниқланиб, ҳисобга қўйилди. 73 та маъмурий ҳуқуқбузарлик ҳолати аниқланди, яъни 45 та ҳолатда фоҳишалик билан шуғулланиш, тўққиз ҳолатда видеомаҳсулотлар ва уларни тайёрлаш, 19 та порнографик маҳсулотлар билан боғлиқ ноқонуний ҳолатлардир. Шундан 1205 та порнографик материаллар белгиланган тартибда олинди.Тўртта давлатда ўтказилаётган тадбирларни умумлаштириш учун Қозоғистон Республикаси Ички ишлар вазирлигида ҳар бир давлатнинг вакиллари иштирокида мувофиқлаштириш штаби тузилди.Қозоғистон Республикасида ўтказилган тадбир давомида Ўзбекистон Республикаси томонидан одам савдоси жинояти учун қидирувда бўлган Ўзбекистон фуқароси аниқланиб, қўлга олинди. Қозоғистондан Ўзбекистонга қайтиш имкони бўлмаган 10 нафар фуқаролар аниқланиб, уларни қайтариш чоралари кўрилди.Остона шаҳри Абай кўчасидаги уйлардан бирида ўтказилган тадбир натижасида 8 нафар қизлар фоҳишалик билан шуғулланаётганликлари, улардан 4 нафар қиз Ўзбекистондан борганликлари аниқланди.Ўзбекистон Республикаси Ички ишлар вазирлиги вакили Остона шаҳридаги «Комек» ва Олмаота шаҳридаги «Родник» ижтимоий ҳимоя қилиш муассасаларида бўлиб, одам савдосидан жабрланган 11 нафар ўзбекистонлик билан суҳбатлашиб, уларни тергов ишлари якунланиши билан Ўзбекистонга қайтариш чоралари келишиб олинди.
Изоҳ (0)